2008 Թ.-ԻՆ ՀԱՅԱՍՏԱՆԻ ՏՆՏԵՍՈՒԹՅՈՒՆ ՕՏԱՐԵՐԿՐՅԱ ՆԵՐԴՐՈՒՄՆԵՐԻ
ԾԱՎԱԼԸ ԿՄՈՏԵՆԱ 700 ՄԼՆ ԴՈԼԱՐԻ ՍԱՀՄԱՆԻՆ,- ԿԱՆԽԱՏԵՍՈՒՄ Է ԶՀԳ-Ի
ՏՆՕՐԵՆԸ
21-12-2007 22:20:00 | Հայաստան | Տնտեսություն
ԵՐԵՎԱՆ, 21 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: 2007թ.-ի արդյունքներով
կարձանագրվեն Հայաստան ներդրումների ներհոսքի գոհացուցիչ
արդյունքներ: Կանխատեսվում է, որ դրանց ծավալը կմոտենա 700 մլն
դոլար սահմանին: Այս մասին դեկտեմբերի 21-ի ասուլիսում հայտնեց
Զարգացման հայկական գործակալության գլխավոր տնօրեն Տիգրան
Դավթյանը:
Նա հիշեցրեց, որ 2007թ.-ի հունվար-սեպտեմբերին Հայաստանի
տնտեսության իրական հատված օտարերկրյա ներդրումների հոսքերի ծավալը
(առանց պետական կառավարման եւ բանկային համակարգով ստացվածի)
կազմել է 469 մլն 947,1 հազ. դոլար, ինչը նախորդ տարվա նույն
ժամանակահատվածի համեմատ աճել է 58%-ով: Դրանից ուղղակի
ներդրումների ծավալը կազմել է 311 մլն 605,7 հազ. դոլար կամ
2006թ.-ի հունվար-սեպտեմբերի ցուցանիշից 2,1 անգամ ավելի:
Տ.Դավթյանը փաստեց, որ Ռուսաստանը դարձել է Հայաստանում
կատարված ներդրումների գծով առաջատարը, «ինչպես եւ խոստացվել էր»
ՌԴ նախագահ Վլադիմիր Պուտինի կողմից:
Նա հավելեց, որ Հայաստանի ներդրումային միջավայրն, ըստ
ներդրողների, բարենպաստ է, իսկ ավելի մեծ ծավալով ներդրումների
ներգրավման առաջին խոչընդոտը հայկական շուկայի փոքրությունն է:
«Այստեղ դրական տեղաշարժեր կան գնողունակության, ՀՆԱ-ի ծավալի եւ
բնակչության մեկ շնչին ընկնող եկամուտների աճի առումով»,- նշեց
Տ.Դավթյանը: Նրա կանխատեսմամբ, Հայաստանի մեկ բնակչի հաշվով ՀՆԱ-ի
ծավալը 2005թ.-ի 1,4 հազար դոլարի դիմաց 2008թ.-ին կկազի 3,3-3,5
հազ. դոլար: Այդ ցուցանիշը բնորոշ է տնտեսական զարգացման միջին
մակարդակ ունեցող երկրներին: Ըստ նրա, կանխատեսվում է նաեւ, որ
2008թ.-ին Հայաստանի ՀՆԱ-ն կանցնի 10 մլրդ դոլարի սահմանը: