ՄԱԿ-Ի ԱՆՎՏԱՆԳՈՒԹՅԱՆ ԽՈՐՀՈՒՐԴԸ ԿՈՍՈՎՈՅԻ ԿԱՐԳԱՎԻՃԱԿԻ
ՎԵՐԱԲԵՐՅԱԼ ՈՐՈՇՈՒՄ ՉԻ ԸՆԴՈՒՆԵԼ
20-12-2007 15:55:00 | ԱՄՆ | Միջազգային
ՆՅՈՒ ՅՈՐՔ, 20 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ՄԱԿ-ի Անվտանգության
խորհուրդը չի կարողացել միասնական կարծիքի հանգել Կոսովոյի
կարգավիճակի հարցի առնչությամբ եւ անզոր է գտնվել մերձեցնել
Բելգրադի եւ Պրիշտինայի դիրքորոշումները: Խորհրդի երեք ժամ տեւած
փակ նիստում քննարկվել է միջազգային միջնորդների «եռյակի» զեկույցը
սերբական այդ երկրամասի կարգավիճակի հարցի վերաբերյալ:
Փաստաթուղթը փաստում է, որ Բելգրադի եւ Պրիշտինայի
բանակցությունները ԵՄ, Ռուսաստանի եւ ԱՄՆ-ի միջնորդությամբ
ավարտվել են առանց արդյունքի:
Խորհրդում կայացած բանավեճը, որին մասնակցել են նաեւ Սերբիայի
վարչապետ Վոիսլավ Կոշտունիցան եւ կոսովյան ալբանցիների
ներկայացուցիչ Ֆատմիր Սեյդիուն, ցույց է տվել, որ երկրամասի
կարգավիճակի հարցում նրանց դիրքորոշումները տրամագծորեն հակադիր են
եւ կողմերը մտադիր չեն միմյանց զիջումների գնալ:
Դրա հետ կապված եվրոպական պետությունների խումբը եւ ԱՄՆ-ը
հայտարարել են, որ բանակցությունների ուղիով Կոսովոյի կարգավիճակի
հարցի լուծման հնարավորությունը սպառված է: ՄԱԿ ԱԽ-ի նիստի ավարտից
հետո Միավորված ազգերին առընթեր Բելգիայի մշտական ներկայացուցիչ
Յոհան Վերբեկեն, ելույթ ունենալով Եվրամիության երկրների եւ ԱՄՆ-ի
անունից, փաստել է, որ Խորհուրդը չի կարող համաձայնություն ձեռք
բերել Կոսովոյի ապագա կարգավիճակի վերաբերյալ, ուստի ԵՄ-ն եւ
ՆԱՏՕ-ն պատրաստ են ստանձնել երկրամասի ճակատագրի
պատասխանատվությունը: Նրա ընթերցած հայտարարության մեջ ընդգծվում
է, որ Կոսովոյի կարգավիճակի հարցի լուծումը համարվելու է եզակի եւ
չպետք է նախադեպ դառնա այլ իրավիճակներում:
Սակայն ՄԱԿ-ին առընթեր ՌԴ մշտական ներկայացուցիչ Վիտալի
Չուրկինը հակառակ կարծիքն է հայտնել` նշելով, որ Կոսովոյի
անկախության միակողմանի ճանաչումը նշված բանաձեւի եւ միջազգային
իրավունքի ուղղակի խախտում է: