ՉԻՆԱՍՏԱՆԻ ԱՄԵՆԱՀԱՐՈՒՍՏ ՄԱՐԴԿԱՆՑԻՑ ՄԵԿԸ ԿՈՌՈՒՊՑԻԱՅԻ
ՄԵՂԱԴՐԱՆՔՈՎ ԴԱՏԱՊԱՐՏՎԵԼ Է 16 ՏԱՐՎԱ ԱԶԱՏԱԶՐԿՄԱՆ
30-11-2007 20:22:00 | Չինաստան | Միջազգային
ՊԵԿԻՆ, 30 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Չինական դատարանը այսօր
16 տարվա ազատազրկման է դատապարտել երկրի ամենահարուստ
ձեռներեցներից մեկին կոռուպցիայի մեղադրանքով: Չժոու Չժենիի
կարողությունը գնահատվում է 320 մլն. դոլար: Ըստ «Ֆորբս» հանդեսի
վարկածի, նա ՉԺՀ առավել հաջողակ մարդկանց ցուցակում զբաղեցնում էր
11-րդ հորիզոնականը:
Նա ձերբակալվել էր անցած տարի Շանհայի սոցիալական
ապահովագրության ֆոնդից միջոցների հափշտակության աղմկահարույց
գործի կապակցությամբ, որտեղ գլխավոր դերակատարը այդ մեգապոլիսի
կուսակցական արդեն նախկին քարտուղար Չեն Լյանյույն էր: Ներկայումս
քննությունը շարունակվում է. հայտնի է, որ ընդհանուր առմամբ
կոռուպցիային մեղսակից են եղել մի քանի տասնյակ խոշոր
ընկերություններ: Սակայն այդ սկանդալի գլխավոր դերակատարի
դատավարությունը դեռ չի սկսվել:
45-ամյա Չժոու Չժենին գլխավորում էր «Նունկայ դեւելոփմենթ
գրուփ» ընկերությունը, որը գործում էր անշարժ գույքի ասպարեզում: