ՎԱՇԻՆԳՏՈՆ, 26 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Ռուսաստանի արտաքին
գործերի նախարար Սերգեյ Լավրովը ժամանել է ԱՄՆ մասնակցելու
մերձավորարեւելյան կարգավորմանը նվիրված Աննապոլիսի համաժողովին:
Ինչպես հայտնել է ՌԴ ԱԳՆ պաշտոնական ներկայացուցիչ Միխայիլ
Կամինինը, Լավրովը գլխավորում է համաժողովի ռուսական
պատվիրակությունը: «Ֆորումի շրջանակում ծրագրվում է անցկացնել մի
շարք երկկողմ հանդիպումներ»,- նշել է դիվանագետը: Նոյեմբերի 26-ին
ծրագրված է Ռուսաստանի ԱԳՆ ղեկավարի հանդիպումը Իսրայելի
պաշտպանության նախարար Էհուդ Բարաքի հետ:
Երեքշաբթի, նոյեմբերի 27-ին, ծրագրվում են ԱԳ նախարարի
բանակցությունները ամերիկացի իր գործընկերոջ` Կոնդոլիզա Ռայսի հետ,
հանդիպումը կկայանա երկկողմ ձեւաչափով: Սպասվում է, որ նրանք
կքննարկեն ՀՀՊ խնդիրը:
Ռուսաստանում համարում են, որ Աննապոլիսում պետք է «պարզորոշ
ազդանշան հղվի հօգուտ Սիրիայի եւ Իսրայելի միջեւ երկխոսության
առանց ձգձգումների վերականգնման, արաբա-իսրայելական կարգավորման
մյուս ուղղությունների վերակենդանացման»,- հայտարարել է Սերգեյ
Լավրովը: