2015թ. սեպտեմբերի 26-ին Արմավիրի մարզի Վանանդ գյուղում Հայաստանի մանուկներ հիմնադրամի (COAF), Հայաստանում ԱՄՆ դեսպանատան և ԱՄՆ ՄԶԳ-ի «Մաքուր էներգիա և ջուր» ծրագրի մասնակցությամբ տեղի ունեցավ դպրոցի մարզադահլիճի բացումը: Այն նշանավորվեց Հիմնադրամի և ԱՄՆ դեսպանատան թիմերի միջև բասկետբոլի ընկերական խաղով՝ ընդգծելով երկու կառույցների միջև ավանդական համագործակցություննը ու երկարատև բարեկամական հարաբերությունները:
Մարզադահլիճի բացման արարողությունից հետո ողջույնի խոսք ասացին Հայաստանի մանուկներ հիմնադրամի գործադիր տնօրեն Անուշ Եդիգարյանը և ՀՀ-ում ԱՄՆ դեսպանատան Վարչական բաժնի ղեկավար Զանդեր Լիփսքոմբը:
Մրցակիցների թիմերը բաղկացած էին սիրողական 12 խաղացողներից՝ աղջիկներից և տղաներից: Խաղի մրցավարները հրավիրվել էին սպորտի և երիտասարդության հարցերի նախարարությունից: Խաղային ընդմիջումները մշակութային տրամադրությամբ լցրեցին Հայաստանի մանուկներ հիմնադրամի շահառու գյուղերի երեխաները: Երկու միավորի առավելությամբ՝ դեսպանատան թիմը գրանցեց հաղթանակ:
«Մարզադահլիճի նորոգումը ոչ միայն մասնակից կազմակերպությունների սերտ համագործակցության արդյունք է, այլև դպրոցի կառուցողական կեցվածքի ու ջանքերի, գյուղացիների օժանդակության և տարիներ շարունակ այս իրադարձությանը սպասող դպրոցականների խանդավառության արգասիք», - ողջույնի իր խոսքում նշեց Հայաստանի մանուկներ հիմնադրամի գործադիր տնօրեն Անուշ Եդիգարյանը:
Հաշվի առնելով Վանանդի դպրոցի մարզադահլիճի հիմնանորոգման հրատապությունը՝ Հիմնադրամը միավորեց ջանքերը ԱՄՆ ՄԶԳ «Մաքուր էներգիա և ջուր» ծրագրի հետ և նոր մարզասրահ նվիրեց Վանանդի երեխաներին: Այս ամենը հնարավոր դարձավ Հիմնադրամի երկարամյա բարեկամներ ու բարերարներ տեր և տիկին Արա և Սոնյա Հասեթների աջակցությամբ: Վերաբացված մարզադահլիճը, ԱՄՆ ՄԶԳ «Մաքուր էներգիա և ջուր» ծրագրի կողմից իրականացված էներգաարդյունավետ ճառագայթային ջեռուցման և լուսադիոդային լուսավորության համակարգերի տեղադրման շնորհիվ, զարգացման ու առաջընթացի նոր հնարավորություններ է ընձեռում երիտասարդ սերնդին: Էներգախնայողության միջոցառումների արդյունքում ստացված տարեկան խնայողությունները կկազմեն մոտ 3,600 ԱՄՆ դոլար, որոնք կուղղվեն դպրոցի այլ կարիքներին:
«Կարևոր է նշել, որ ԱՄՆ ՄԶԳ այս ներդրումը ոչ միայն կօգնի էներգիա խնայել և պաշտպանել շրջակա միջավայրը, այլև շարունակական խնայողությունների հնարավորություն կտա, ինչն էլ կարող է ուղղվել կրթական հետագա ծրագրերին, - ասաց ԱՄՆ դեսպանատան Վարչական բաժնի
ղեկավար Զանդեր Լիփսքոմբը: -Սա միայն մեկ օրինակ է բազմաթիվ արժեքավոր համագործակցությունների, որ ԱՄՆ դեսպանաունը մշակել է: Հայաստանի քաղաքացիների, կառավարության և տեղական ՀԿ-ների հետ համատեղ աշխատանքը թույլ է տալիս մեզ սատարել ծաղկուն Հայաստանի կառուցմանն ուղղված ջանքերին»:
Հիմնադրամի կրթական ծրագրերի շրջանակներում Վանանդի դպրոցում հիմնադրվել և գործում է ստեղծագործարան`հագեցած տեխնոլոգիայի և գիտելիքի վերջին խոսքով, վերազինվել է դպրոցի գրադարանը և ռեսուրս կենտրոնը, իրականացվում են արտադասարանային խմբակներ, ամառային դպրոցներ, սոցիալական և զգայական ուսուցում ուսուցիչների համար, մեդիագրագիտության դասընթաց միջին և ավագ դպրոցի աշակերտների համար:
Դպրոցներում առողջությունը խրախուսելու և երեխաների մոտ վաղ տարիքից ճիշտ վարքագիծ ձևավորելու նպատակով դպրոցում գործում են նաև «Առողջ սնուցում» և «Ատամների խնամք» ծրագրերը, ինչպես նաև ստեղծվել է ատամների մաքրման կետ և կահավորվել է ճաշարանը: Ուսումնական տարվա ընթացքում ամեն օր տաք և առողջ սնունդ է մատուցվում տարրական դպրոցի երեխաներին, իսկ վերապատրաստված ուսուցիչներն ու բուժքույրերն իրականացնում են դասընթացներ` առամների մաքրման թեմայով:
2013թ. դեկտեմբերին, Հիմնադրամի առողջապահական ծրագրի շրջանակներում վերանորոգվել է Վանանդի բուժկետը, 2014թ. մարտին՝ բացվել դպրոցի խաղահրապարակը, իսկ 2014թ. մայիսին՝ Վանանդի դպրոցն ընդգրկվել է «Առողջությունը խրախուսող դպրոցների» եվրոպական ցանցում:
* * *
Հայաստանի մանուկներ հիմնադրամը (COAF) բարեգործական կազմակերպություն է, որի նպատակն է բարձրացնել Հայաստանի գյուղաբնակների կյանքի որակը համայնքային զարգացման երեխայակենտրոն ծրագրերի միջոցով: Հիմնադրամի համակողմանի ծրագրային մոդելի իրագործումը սկսվել է 2004թ., և այդ ժամանակից ի վեր իրականացվում են կրթական, առողջապահական, սոցիալական և տնտեսական ծրագրեր, ինչպես նաև հիմնանորոգվում են համայնքների համար կենսական նշանակություն ունեցող ենթակառուցվածքները: Այս ծրագրերի շահառուներն են Հայաստանի Արմավիր և Արագածոտն մարզերի 22 գյուղական համայնքների բնակիչները: 2014թ. ի վեր Հիմնադրամը զարգացման ծրագրեր է իրականացնում նաև ՀՀ Լոռու մարզի Թումանյան շրջանի համայնքներում: Առավել մանրամասն տեղեկությունների համար խնդրում ենք այցելել am.coafkids.org և www.coafkids.org կամ զանգահարել հետևայալ հեռախոսահամարներով (010) 50 20 76, բջջային՝ 077 37 60 41 (Ինեսսա Գրիգորյան):
ԱՄՆ ՄԶԳ-ի «Մաքուր էներգիա և ջուր» ծրագիրը (ՄԷՋԾ) նպատակն էր բարելավել Հայաստանում ջրային և էներգետիկ ռեսուրսների կառավարումը, ինչպես նաև աջակցել կլիմայի փոփոխության մարտահրավերների արդյունավետ հաղթահարմանը: 2011-2015 թվականների ընթացքում ՄԷՋԾ-ի կողմից Հայաստանի տարբեր մարզերում իրականացվեց համայնքային ենթակառուցվածքների վերականգնման 24 ծրագիր՝ ջրամատակարարման և լուսավորության համակարգերի բարելավման, ջեռուցման համակարգերի տեղադրման, շենքերի ջերմամեկուսացման և արևային էներգիայի օգտագործման ոլորտներում: Տարբեր այլ գործընկերների և համայնքապետարանների հետ համատեղ իրականացված մոտ 1.306.000 ԱՄՆ դոլար ընդհանուր բյուջե ունեցող ծրագրերի շահառուների թիվը կազմում է ավելի քան 50,000 մարդ: