2008 Թ.-ԻՑ ՀԱՆՐԱՊԵՏՈՒԹՅԱՆ ՋՕԸ-ԵՐԻՆ ԿՑՈՒՑԱԲԵՐՎԻ
ԴՐԱՄՇՆՈՐՀԱՅԻՆ ԱՋԱԿՑՈՒԹՅՈՒՆ
08-02-2007 18:28:00 | Հայաստան | Տնտեսություն
ԵՐԵՎԱՆ, 8 ՓԵՏՐՎԱՐԻ, ՆՈՅՅԱՆ ՏԱՊԱՆ: «ՀՀ 2007թ.-ի պետական
բյուջեի մասին» ՀՀ օրենքին համապատասխան, փետրվարի 8-ի նիստում ՀՀ
կառավարությունը հաստատել է ՀՀ 2007թ.-ի պետական բյուջեի
համապատասխան ծրագրով նախատեսված «Որոտան- Արփա-Սեւան» թունելների
շահագործման վարչություն» պետական հիմնարկի պահպանման,
Որոտան-Արփա-Սեւան ջրային համակարգի շահագործման, տեխնիկական
վիճակի բարելավման եւ նորոգման 2007թ.-ի ծրագիրը:
Նիստում հաստատվել են նաեւ ջրօգտագործողների
ընկերություններին (ՋՕԸ) պետական ֆինանսական աջակցության
բարեփոխումների հիմնադրույթները, որոնց հիմնական նպատակներն են`
ջրօգտագործողներին աջակցությունն ու մասնակցային կառավարման
ամրապնդումը, ջրօգտագործողների ընկերությունների գործունեության
արդյունավետության բարձրացումն ու ինքնածախսածածկման մակարդակի
աստիճանական ավելացումը, ինչպես նաեւ պետական ծախսերի
կանխատեսելիության ու բաշխման արդյունավետության աճը: Նշվել է, որ
բարեփոխումների արդյունքում կապահովվի ջրօգտագործողների
ընկերություններին պետական ֆինանսական աջակցության
(սուբսիդավորման) ներկայումս կիրառվող ծախսային ավանդական մեթոդից
անցումը ըստ արդյունքների դրամաշնորհային օժանադակության
տրամադրման:
Հաստատվել են նաեւ 2007-2011թթ.-ի կտրվածքով` ըստ
ջրօգտագործողների ընկերությունների պետական ֆինանսական աջակցության
գնահատվող չափաքանակները, ինչպես նաեւ ոռոգման ջրի կորուստների
առավելագույն մակարդակները:
Որոշումն ընդունվել է հիմք ընդունելով նաեւ ՀԲ-ի «Աղքատության
հաղթահարման աջակցության երրորդ վարկի» նախապատրաստման ճապոնական
դրամաշնորհի շրջանակում ՀՀ ոռոգման համակարգի ֆինանսական եւ
կառուցվածքային բարեփոխումների իրականացման ծրագրով ներկայացված
առաջարկությունները:
Ինչպես նիստից հետո հայտնեց ՀՀ Տարածքային կառավարման
նախարարության Ջրային տնտեսության պետական կոմիտեի նախագահ
Անդրանիկ Անդրեասյանը, դրամաշնորհային աջակցության մեթոդը
հնարավորություն է տալիս գնահատել ՋՕԸ-երի աշխատանքի արդյունքները,
որոնց հիման վրա էլ կտրամադրվի աջակցությունը: Նոր մեթոդը, ամենայն
հավանականությամբ, կկիրառվի 2008թ.-ից: Այս տարի կմշակվեն դրա
կիրառման հետ կապված համպատասխան իրավական փաստաթղթերը:
Նշվեց, որ դրամաշնորհը տրվելու է այն ՋՕԸ-երին, որոնք
աշխատելու են երեք սկզբունքով. պետք է պահպանեն ոռոգվող
տարածքները, չավելացնեն պարտքերը եւ պահպանեն սակագնի որոշակի
սահմանը:
Ա.Անդրեասյանի խոսքերով, հանրապետությունում գործող 51
ՋՕԸ-երի տեխնիկական հնրավորությունները թույլ են տալիս բավարար
ջրամատարարում ապահովել: