Հայաստանը դյուրացրել է մուտքի արտոնագրային ռեժիմը Չինաստանի
քաղաքացիների համար
17-02-2011 20:55:00 | Հայաստան | Քաղաքական
ԵՐԵՎԱՆ, 17 ՓԵՏՐՎԱՐԻ, ՆՈՅՅԱՆ ՏԱՊԱՆ: Չինաստանի արտաքին
գործերի նախարարի այցը Հայաստան վկայում է երկու երկրների միջեւ
ակտիվ զարգացում ապրող հարաբերությունների մասին: Պաշտոնական այցով
Հայաստանում գտնվող Չինաստանի արտաքին գործերի նախարար Յան Ձիեչիի
հետ փետրվարի 17-ի համատեղ ասուլիսում հայտարարեց ՀՀ արտաքին
գործերի նախարար Էդվարդ Նալբանդյանը: «Մենք երկուստեք կարեւորեցինք
երկու երկրների միջեւ բարձր մակարդակի շփումների պարբերական
բնույթը եւ համոզմունք հայտնեցինք, որ դրանք նոր թափ կհաղորդեն մեր
հարաբերությունների հետագա զարգացմանը ու խորացմանը»,- ասաց նա:
Արտգործնախարարները քննարկել են նաեւ երկու երկրների
նախագահների միջեւ ձեռք բերված պայմանավորվածությունների կատարման
ընթացքը: «Կարծում եմ, որ օրերս Հայաստանի կառավարության կողմից
Չինաստանի քաղաքացիների համար մուտքի արտոնագրային ռեժիմի
դյուրացման վերաբերյալ ընդունված որոշումը նոր թափ կհաղորդի
գործարար, մշակութային, կրթական եւ ընդհանրապես ժողովուրդների
միջեւ կապերին եւ փոխանակումներին»,- ասաց Է.Նալբանդյանը:
Քննարկվել են նաեւ միջազգային եւ տարածաշրջանային խնդիրներ,
այդ թվում` ղարաբաղյան հակամարտության խնդիրը: Հայաստանը
Չինաստանին շնորհակալություն է հայտնել այդ հարցում հավասարակշռված
դիրքորոշման համար:
Է.Նալբանդյանը համոզմունք հայտնեց, որ «կարեւոր քաղաքական
երկխոսությունը, բազմակողմ ձեւաչափում փոխադարձ աջակցությունը
նպաստում են Հայաստանի եւ Չինաստանի միջեւ փոխըմբռնման եւ
վստահության մեծացմանը»: Քննարկվել են նաեւ երկու երկրների արտաքին
քաղաքական գերատեսչությունների միջեւ խորհրդատվությունների
ակտիվացման, միջազգային կառույցներում երկու երկրների
համագործակցության սերտացմանը վերաբերող հարցեր:
Է.Նալբանդյանը եւ Յան Ձիեչին քննարկել են նաեւ
համագործակցության ոլորտներն ընդլայնելու եւ նորերն ընդգրկելու
հնարավորությունները: Մասնավորապես, անդարդարձ է եղել
էներգետիկայի, հանքարդյունաբերության, գյուղատնտեսության,
տրանսպորտի եւ առողջապահության, այլ ոլորտներում
փոխգործակցությանը: Քննարկվել են նաեւ առեւտրա-տնտեսական
հարաբերությունների խթանմանը, իրավապայմանագրային դաշտի
կատարելագործմանը, մշակութային ու կրթական փոխանակումների
ընդլայնմանը, ապակենտրոնացված համագործակցության վերաբերող
հարցերը:
Երկկողմ տնտեսական կապերի զարգացման տեսանկյունից ՀՀ
արտգործնախարարը կարեւորեց չինական Շանսի քաղաքում «Շանսի-Նաիրիտ»
համատեղ ձեռնարկության գործարկումը: Կարեւորվեցին նաեւ Հայաստանում
Չինաստանի կողմից իրականացվող ծրագրերը` ՀԷԿ-երի կառուցումը,
հեռահաղորդակցության բնագավառում համագործակցությունը:
ՀՀ ԱԳ նախարարը շնորհակալություն հայտնեց Չինաստանի
կառավարությանը շարունակական տեխնիկական աջակցության համար, որի
շրջանակներում 2011թ.-ին Հայաստանին կտրամադրվեն շտապօգնության
շուրջ 80 մեքենաներ, իսկ հետագայում նաեւ մի քանի տասնյակ
ավտոբուսներ: