Երևանում անցկացվելու է «Դատապարտում ենք ցեղասպանությունները» խորագրով արևելյան մարտարվեստի միջազգային մրցաշարեր
18-04-2015 17:27:28 | Հայաստան | Սպորտ
Ապրիլի 21-ից 26-ը Երևանում անցկացվելու է «Դատապարտում ենք ցեղասպանությունները» խորագրով միջազգային մրցաշարեր` Կիոկուշին-կան կարատե-դո, Քիք բոքսինք և Ուշուի մարզաձևերում:
Ինչպես ապրիլի 18-ին լրագրողների հետ հանդիպման ժամանակ նշեց Հայաստանի ավանդական ուշուի ֆեդերացիայի նախագահ Տիգրան Չոբանյանը, միջազգային մրցաշարերին մասնակցելու են Հայաստանի, Արցախի, Իրանի, Իրաքի, Ղազախստանի, Վրաստանի և Ֆրանսիայի թիմերը` բաղկացած շուրջ 240 մարզիկներից:
«Մենք հրավիրել ենք բոլոր այն երկրներին, որտեղ կան այս երեք մարզաձևերը, այդ թվում նաև Թուրքիային և Ադրբեջանին» ,- ասաց Տ. Չոբանյանը` հավելեով, որ Հայաստան ժամանող օտարերկրյա թիմերն այցելելու են Ծիծեռնակաբերդի հուշահամալիր` հարգանքի տուրք մատուցելու Հայոց ցեղասպանության զոհերի հիշատակին:
Ըստ նրա` մրցաշարերի խորագիրը վերաբերում է ինչպես Հայոց Ցեղասպանությանը, այլ բոլոր ցեղասպանություններին, որոնք հաջորդեցին 20-րդ դարի առաջին, հայերի ցեղասպանությանը:
«Մենք համարում ենք, որ մեր ապագա սերունդները պետք է անպայման ունենան հաղթողի հոգեբանություն, ուստի հենց այս ժամանակահատվածում ենք անցկացնում մեր մրցաշարերը` ցույց տալով ամբողջ աշխարհին, որ հիշում ու հարգում ենք մեր զոհերին, սակայն միաժամանակ պատրաստ ենք պայքարելու և կռվելու հանուն մեր հայրենիքի ազատության, մարդկային արժեքների»,- նշեց Տ. Չոբանյանը:
Նրա տեղեկացմամբ` վերհոնշյալ գաղափարախոսության շրջանակներում որոշվել է միջազգային մրցաշարերի բացումը իրականացնել «Սասունցի Դավիթ» էպոսի բեմականացմամբ, որի միջոցով ցուցադրվելու է հայի ուժը և հաղթանակը:
Ըստ Տ. Չոբանյանի` միջազգային մրցաշարն անցկացվում է «Դինամո» մարզական ընկերության աջակցությամբ, Հայաստանի Սպորտի և երիտասարդության հարցերով նախարարության ֆինանսավորմամբ և Վ. Բրյուսովի անվան լեզվաբանական համալսարանի «Կոնֆուցիոզ» ինստիտուտի աջակցությամբ:
Կիոկուշին-կան կարատե-դո համահայկական ֆեդերացիայի նախագահ Անդրանիկ Հակոբյանի խոսքով` ապրիլի 21-ին մրցաշարի բացումն անելու է հենց իրենց ֆեդերացիան:
«Այսպիսի սպորտային միջոցառումների միջոցով մենք կարող ենք աշխարհին ճանաչելի դարձնել հայ ժողովրդի պատմությունը»,- ասաց Ա. Հակոբյանը և ավելացրեց, որ սպորտի և մշակույթի միջոցով հնարավոր է լուծել անգամ այն հարցերը, որոնք քաղաքականապես դժվար լուծելի են: