Ավստրալիայի վարչապետն առաջարկել է ահաբեկիչներին բանտերից ազատ չարձակել
11-12-2015 19:20:09 | Ավստրալիա | Միջազգային
Ավստրալիայում ահաբեկչական գործողությունների համար երբևէ դատապարտված կալանավորները կարող են կորցնել իրենց ազատ արձակման իրավունքը:
tass.ru-ի փոխանցմամբ, օրենսդրության մեջ համապատասխան փոփոխություններ կատարելու առաջարկով հանդես է եկել երկրի վարչապետ Մալքոլմ Թըրնբուլը:
Ուրբաթ օրը վարչապետը հանդիպում է ունեցել կառավարության անդամների և երկրի բոլոր նահանգների առանցքային նախարարների հետ:
Օրենսդրության մեջ նման փոփոխություններ կատարելու ծրագիրը նախաձեռնել է Դաշնային խորհրդարանի երկու պալատների համատեղ կոմիտեի հետախուզության և անվտանգության հարցերով ներկայացուցիչ Դեն Թիենը:
Ըստ նրա, ահաբեկչական սպառնալիքներին արդյունավետորեն դիմակայելու համար անհրաժեշտ է դաշնային և նահանգային իշխանություններին իրավունք տալ անորոշ ժամկետով ահաբեկչության մեղադրանքով դատապարտվածների ազատազրկման ժամկետը երկարաձգել, եթե իշխանությունները կարծում են, որ բանտարկյալների ազատ արձակումը կարող է վտանգ ներկայացնել հասարակության համար: