ՆԱՏՕ-ն ողջունում է հայ-թուրքական հարաբերությունների
կարգավորման գործընթացը
05-11-2009 16:50:00 | Հայաստան | Քաղաքական
ԵՐԵՎԱՆ, 5 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Հայաստանի Ազգային
անվտանգության խորհրդի քարտուղար Արթուր Բաղդասարյանի եւ Կովկասում
եւ Կենտրոնական Ասիայում ՆԱՏՕ-ի գլխավոր քարտուղարի հատուկ
ներկայացուցիչ Ռոբերտ Սիմոնսի նոյեմբերի 5-ի հանդիպմանը քննարկվել
են Հայաստան-ՆԱՏՕ «Անհատական գործընկերության գործողությունների
ծրագրով» 2009թ.-ին նախատեսված գործողությունների իրականացման հետ
կապված հարցեր:
Ա.Բաղդասարյանը տեղեկացրել է, որ Հայաստան-ՆԱՏՕ «Անհատական
գործընկերության գործողությունների ծրագրի» համաձայն բարեփոխումներ
են իրականացվում պաշտպանության, արդարադատության, արտակարգ
իրավիճակների, առողջապահության, իրավապահ մարմինների
գործունեության ոլորտներում: Նա կարեւորվել է Հայաստանում
ճգնաժամային կառավարման կենտրոնի ստեղծման, սահմանային
անվտանգության ապահովման, այս ուղղությամբ անհրաժեշտ
ենթակառուցվածքների ստեղծման, ահաբեկչության եւ կազմակերպված
հանցավորության դեմ պայքարի գործում Հայաստան-ՆԱՏՕ
համագործակցության առավել խորացումը:
Ռ.Սիմոնսը գոհունակություն է հայտնել գործողությունների
ծրագրի իրականացման ընթացքից եւ արձանագրված առաջընթացը գնահատել
դրական:
Ըստ ԱԱԽ-ի քարտուղարի մամուլի գրասենյակի, հանդիպմանը
անդրադարձ է եղել նաեւ տարածաշրջանային խնդիրներին: Ռ.Սիմոնսը նշել
է, որ ՆԱՏՕ-ն ողջունում է հայ-թուրքական հարաբերությունների
կարգավորման գործընթացը, ինչպեսեւ` ԼՂ խնդրի կարգավորման հարցում
Մինսկի խմբի գործունեությունը: