Սփյուռքում շատերը զարմանում են, թե ինչպես է վարչապետի
պաշտոնը վստահվել Տիգրան Սարգսյանին,- ասում է ՀՌԱԿ-ի ահենապետը
04-03-2009 15:16:00 | Հայաստան | Քաղաքական
ԵՐԵՎԱՆ, 4 ՄԱՐՏԻ, ՆՈՅՅԱՆ ՏԱՊԱՆ: Ըստ Հայաստանի
Ռամկավար-ազատական կուսակցության (ՀՌԱԿ) ատենապետ Հարություն
Առաքելյանի, ԱՄՆ-ի դոլարի փոխարժեքը պետք է բարձրացվեր ոչ թե
միանգամից, այլ աստիճանաբար: Նշելով, այս մասին մարտի 4-ի
ասուլիսում, նա նաեւ հայտարարեց, որ կառավարության մյուս սխալը
հարկային սլաքը դեպի փոքր եւ միջին բիզնեսը ուղղորդելն էր: «Մեր
վարչապետը իրեն պատկերացրեց Շվեյցարիայի վարչապետ»,- ասաց
Հ.Առաքելյանը` պարզաբանելով, որ անխտիր բոլոր խավերի հանդեպ նույն
խիստ մոտեցումը կարելի է ցուցաբերել միայն Շվեյցարիայի նման
զարգացած երկրներում: Նրա խոսքերով, վարչապետը համարձակություն
չունեցավ հարկեր պահանջել գերշահույթ ստացող մոնոպոլիստներից:
«Առհասարակ, ընկածին չեն հարվածում, այդ պատճառով ես էլ չեմ խոսի
ճղճիմ, բանկրոտ վարչապետի մասին»,- ասաց ՀՌԱԿ-ի ատենապետը: Նա նաեւ
հավելեց, որ Սփյուռքում շատերը զարմանում են, թե ինչպես է
կառավարության ղեկավարի պաշտոնը վստահվել Տիգրան Սարգսյանին:
Անդրադառնալով ՀՌԱԿ-ի վերջին համագումարին, Հ.Առաքելյանը
նշեց, որ թյուր են մամուլի այն հրապարակումները, համաձայն որոնց
ՀՌԱԿ - «Դաշինք» - Հայաստանի ազատական-առաջադիմական - «Ազգային
վերածնունդ» կուսակցությունների միավորումն այդպես էլ տեղի չի
ունեցել: Այդ սխալ պատկերացումները, ըստ բանախոսի, առաջացել են այն
պատճառով, որ նշված ուժերի նախկին առաջնորդները համագումարին ներկա
չէին: «Սակայն, պետք է հասկանալ, որ միավորվել են ոչ թե անհատ
քաղաքական գործիչները, այլ կուսակցականները»,- պարզաբանեց
Հ.Առաքելյանը: