2008թ.-ին Հայաստանի բնակչության թվաքանակը կազմել է 3 մլն
238,4 հազ. մարդ, ինչը 8,3 հազարով ավել է նախորդ տարվա ցուցանիշից
20-02-2009 20:00:00 | Հայաստան | Տնտեսություն
ԵՐԵՎԱՆ, 20 ՓԵՏՐՎԱՐԻ, ՆՈՅՅԱՆ ՏԱՊԱՆ: 2008թ.-ին ՀՀ բնակչության
թվաքանակը կազմել է` 3 մլն 238,4 հազ. մարդ տարեսկզբի նկատմամբ
աճելով 8,3 հազարով: Այս մասին փետրվարի 20-ի ասուլիսում հայտնեց
ՀՀ Ազգային վիճակագրական ծառայության պետ Ստեփան Մնացականյանը:
Ըստ նրա, 2008թ.-ին արձանագրվել է ծնելիության բացարձակ
թվաքանակի աճ` 2,8%-ով (2008թ.-ին գրանցվել են 41 հազ. 238
ծնվածներ` 2006թ.-ի 40 հազ. 105 ծնվածների դիմաց), իսկ ծնելիության
ընդհանուր գործակիցը 1000 բնակչի հաշվով, կազմել է 12,8 պրոմիլ`
2007թ.-ի 12,4 պրոմիլի դիմաց: Մահացության ընդհանուր գործակիցը
աճել է 0,2 պրոմիլով (2008թ.-ին գրանցվել է մահվան 27 հազ. 442
դեպք` 2007թ.-ի 26 հազ. 830-ի դիմաց) եւ կազմել է 8,5 պրոմիլ:
Գրանցվել է մայրական մահացության 15 դեպք` 2007թ.-ի 6 դեպքի դիմաց:
Նշվեց, որ կյանքի առաջին տարում մանկական մահացության դեպքերը
2008թ.-ին կազմել են 444 եւ 2007թ.-ի համեմատ աճել 2,5%-ով, իսկ
մանկական մահացության գործակիցը կազմել է 10,8 պրոմիլ` 2007թ.-ի
10,9 պրոմիլի դիմաց (1000 կենդանի ծնվածի հաշվով):
Ըստ Ս.Մնացականյանի, 2008թ.-ին գրանցված ամուսնությունների
թիվը 2007թ.-ի համեմատ աճել է 1,8%-ով եւ կազմել 18 հազ 465, իսկ
ամուսնալուծություններինը` 3,4%-ով եւ կազմել 3 հազ. 31 (1000
ամուսնության դիմաց 2008թ.-ին արձանագրվել է 164, իսկ 2007թ.-ին`
162 ամուսնալուծություն):