IT ոլորտում գործող «Սորսիո» ընկերությանը 125 մլն դրամի
աջակցություն տրամադրվեց
19-02-2009 19:00:00 | Հայաստան | Տնտեսություն
ԵՐԵՎԱՆ, 19 ՓԵՏՐՎԱՐԻ, ՆՈՅՅԱՆ ՏԱՊԱՆ: Հայաստանի տնտեսության
զարգացմանը նպաստող ծրագրերի շրջանակներում ՀՀ կառավարության
փետրվարի 19-ի նիստում որոշվեց 125 մլն դրամի (մոտ 403,8 հազ. ԱՄՆ
դոլար) աջակցություն տրամադրել IT ոլորտում գործող «Սորսիո»
ընկերությանը: Ինչպես նշեց էկոնոմիկայի նախարար Ներսես Երիցյանը,
ընկերության ներկայացրած ներդրումային ծրագիրը հավանության է
արժանացել մասնավոր հատվածի օժանդակության ծրագրերի քննարկման
նպատակով կառավարությունում ստեղծված օպերատիվ շտաբում:
Նախարարի խոսքերով, ընկերությունը ներկայումս ունի 50
աշխատատեղ, տարեկան վճարում է 39 մլն դրամի հարկ, իսկ
շրջանառությունը կազմում է 125 մլն դրամ: Ն.Երիցյանի գնահատմամբ,
աջակցության արդյունքում ակնկալվում է աշխատատեղերի քանակը հասցնել
200-ի, 5 տարվա ընթացքում հաճախորդների թիվը հասցնել 80 հազարի`
ներկայիս 1000-ի փոխարեն, իսկ եկամուտները ավելացնել 120 անգամ:
ՀՀ վարչապետ Տիգրան Սարգսյանը ընդգծեց, որ կառավարության
օժանդակությունը հնարավորություն կտա ընկերության արտահանման
ծավալները հասցնել 60 մլն դոլարի: Նշվեց նաեւ, որ «Սորսիոյի»
արտադրանքը հիմնականում վաճառվում է արտերկրում, այդ իսկ պատճառով
ընկերությունը նախատեսում է իր ներկայացուցչությունը բացել
ԱՄՆ-ում` Սիլիկոնային հովտում: «Չնայած համաշխարհային տնտեսական
ճգնաժամին, այս ընկերությունը կարողացել է գտնել իր տեղը
շուկայում, իսկ մենք նպաստում ենք, որ ճգնաժամի պայմաններում այն
հաղթած դուրս գա, երբ շատերը չեն դիմանում IT ոլորտում
մրցակցությանը»,- նշեց Տ.Սարգսյանը: