Թուրքական օդուժի հարվածից Շանգալի կենտրոնում զոհվել է ազգությամբ եզդի հրամանատար Սայիդ Խդըր Հասանը
16-08-2021 19:57:06 | Իրաք | Միջազգային
Այսօր թուրքական օդուժը հարվածել է Շանգալի կենտրոնում գտնվող մեքենային, որի հետևանքով զոհվել է ազգությամբ եզդի հրամանատար Սայիդ Խդըր Հասանը, իսկ երեք մարդ վիրավորվել է: Ինչպես տեղեկանում ենք Շանգալի պաշտպանության հրամանատարության տարածած հայտարարությունից, հրամանատար Սայիդ Խդըր Հասանը և նրա քրոջ որդին ՝ մարտիկ Իսա Խուդեդան, զոհվել են հարձակման հետևանքով, իսկ երեք խաղաղ բնակիչներ Քասիմ Սիմոն, Շամիր Աբբաս Բերչեսն և Միրզա Ալին, վիրավորվել են:
Եզդի ժողովրդի դեմ ուղղված այսօրինակ հարձակման միջոցով, որն առաջին դեպքը չէ, թուրքական պետությունը փորձում է շարունակել իր ցեղասպանական գործողություններն ու քայլերը:
Այս հարձակումը ըստ էության ուղղված էր եզդի ժողովրդի ինքնապաշտպանության և ինքնակառավարման հիմնարար իրավունքի և ազատության դեմ: Մեծ հրամանատար Սայիդի սպանությունը անպատասխան չի մնա: Մենք կոչ ենք անում միջազգային հանրությանը ՝ անտարբեր չմնալ և դիմել գործնական քայլերի` ապահովելու եզդի ժողովրդի անվտանգ կենսագործունեությունը և խաղաղ կյանքը ու կանխարգելելու ժողովրդի անվտանգության դեմ ուղղված գործողությունները` բացառելով ապագայում դրանց կրկնությունը: