ՊՐԻՇՏԻՆԱ, 17 ՓԵՏՐՎԱՐԻ, ՆՈՅՅԱՆ ՏԱՊԱՆ: Կոսովոյի ինքնահռչակ
հանրապետությունն այսօր նշում է իր անկախության առաջին տարեդարձը:
Այդ ժամանակամիջոցում Կոսովոն ձեռք է բերել սեփական օրհներգ, դրոշ,
սահմանադրություն եւ պետականության մի ամբողջ շարք այլ
ատրիբուտներ, այդուհանդերձ դիտորդներից շատերը երկրի իրադրությունը
գնահատում են անկայուն: Անվտանգությունն այստեղ այսօր էլ ապահովում
են ՆԱՏՕ-ի խաղաղապահ ուժերը, իսկ տնտեսությունը ուղղակիորեն կախված
է ԱՄՆ-ի եւ ԵՄ-ի ֆինանսական օգնությունից, որ կազմում է
հարյուրավոր միլիոն եվրո:
Կոսովոյի անկախությունը ճանաչել են 54 պետություն, ներառյալ
ԱՄՆ-ը, Մեծ Բրիտանիան, Ֆրանսիան եւ Իտալիան: Մինչդեռ, Սերբիան
շարունակում է Կոսովոն համարել իր տարածքի անքակտելի մաս: Բելգրադի
դիրքորոշումը պաշտպանում են Ռուսաստանը, Չինաստանը, Հնդկաստանը եւ
բազմաթիվ այլ երկրներ, որոնց կարծիքով Կոսովոյի անկախության
հռչակումը հակասում է միջազգային իրավունքին:
Այդ քայլի օրինականության հարցը Սերբիայի պահանջով հանձնված է
Հաագայի միջազգային դատարանի քննությանը: