Իսրայելի ներխուժումը Լիբանան կարող է լայն հակամարտություն առաջացնել տարածաշրջանում․ ԱՄՆ բարձրաստիճան գեներալ
24-06-2024 14:40:54 | Հայաստան | Ի՞նչ է գրում մամուլը
Հայկական ժամանակ. Իսրայելի ներխուժումը Լիբանան կարող է վերածվել ավելի լայն հակամարտության՝ ներգրավելով Իրանը և Իրանի աջակցությունը վայելող զինյալներին։ Նման կարծիք է հայտնել ԱՄՆ օդուժի գեներալ, զինված ուժերի շտաբների պետերի միացյալ կոմիտեի նախագահ Չարլզ Բրաունը։
Այս մասին հաղորդում է Reuters գործակալությունը։
Բրաունի կարծիքով՝ Իրանը հակված է ավելի ակտիվորեն աջակցել «Հեզբոլլահ»-ին, քան ՀԱՄԱՍ-ին, հատկապես, եթե զգա, որ «Հեզբոլլահ»-ին «լուրջ վտանգ է սպառնում»։
««Հեզբոլլահ»-ն ավելի մարտունակ է, քան ՀԱՄԱՍ-ը, երբ խոսքը վերաբերում է ընդհանուր հնարավորություններին, հրթիռների քանակին և նման բաներին։ Եվ ես պարզապես կասեի, որ, իմ կարծիքով, Իրանն ավելի հակված կլինի ավելի մեծ աջակցություն ցուցաբերել «Հեզբոլլահ»-ին»,- լրագրողներին ասել է Բրաունը:
Իսրայելի վարչապետ Բենիամին Նեթանյահուն հունիսի 23-ին Channel 14 հեռուստաընկերության հետ հարցազրույցի ժամանակ հայտարարել էր, որ պաղեստինյան ՀԱՄԱՍ արմատական շարժման դեմ պատերազմի «ինտենսիվ փուլը շուտով կավարտվի», և որ զինվորականների ուշադրությունը կկենտրոնանա Լիբանանի հետ Իսրայելի սահմանի վրա։