Կայացավ «Վահան Թեքեյան» ամենամյա մրցանակաբաշխության վերջին`
գեղանկար եւ քանդակ անվանակարգերի աշխատանքների ցուցադրությունը
05-02-2010 19:30:00 | Հայաստան | Մշակույթ
ԵՐԵՎԱՆ, 5 ՓԵՏՐՎԱՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Փետրվարի
5-ին Հայաստանի Թեքեյան մշակութային միության «Վահան Թեքեյան»
ամենամյա մրցանակաբաշխանն ամփոփվեցին վերջին` գեղանկար եւ քանդակ
անվանակարգերի մասնակիցների աշխատանքները, ցուցադրության
ներկայացվեց 23 գեղանկարիչների եւ 8 քանդակագործների մեկական
աշխատանք: Այս տարի մրցանակաբաշխությունն ընդգրկում է մշակույթի 9
բնագավառներ` գրականություն, երաժշտություն, թատրոն,
հեռուստառադիոլրագրություն, գեղանկար, քանդակ, մանկապատանեկան
ստեղծագործություններ, սոցիալ-քաղաքական եւ երգիծական
անվանակարգեր, որին մասնակցել են ինչպես Հայաստանի Հանրապետության,
այնպես էլ Արցախի, Ջավախքի, ինչպես նաեւ Սփյուռքի շուրջ 250-300,
հիմնականում երիտասարդ ստեղծագործողներ:
Թեքեյան մշակութային միության նախագահ Ռուբեն Միրզախանյանի
խոսքերով` մրցույթին ներկայացվող աշխատանքների միակ սահմանափակումն
այն էր, որ աշխատանքները պետք է ստեղծված լինեին 2008թ. ընթացքում:
Ըստ նրա` ժյուրին արդեն իսկ կայացրել է իր որոշումը, իսկ բոլոր 9
անվանակարգերի աշխատանքները կամփոփվեն փետրվարի 9-ին եւ
կհայտարարվեն հաղթողների անունները:
«Բոլոր անվանակարգերն ունեն մեկ մրցանակային տեղ, իսկ
մրցանակն իրենից ներկայացնում է 1000 ամերիկյան դոլարին համարժեք
դրամ, ինչպես նաեւ հուշատախտակ այն մասին, որ նա համարվում է այս
թվականի համապատասխան անվանակարգի հաղթողը»,- նշեց միության
նախագահը: