ՍՈՒԴԱՆՈՒՄ ԱՌԵՎԱՆԳՎԱԾ ԻՆԸ ՉԻՆԱՑԻՆԵՐԻՑ ԵՐԵՔԸ ՍՊԱՆՎԵԼ ԵՆ
29-10-2008 17:29:00 | Սուդան | Միջազգային
ԽԱՐՏՈՒՄ, 29 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Սուդանում առեւանգված
ինը չինացի նավթագործներից երեքը սպանվեն են պատանդառուների
կողմից: Այս ճշտված տվյալները հայտնել է երկրի արտաքին գործերի
նախարարի տեղակալ Մուտրիֆ Սիդդիկը: Եվս երեք չինացիներ ազատության
մեջ են, սակայն` վիրավոր: Մնացածների ճակատագրի մասին առայժմ ոչինչ
հայտնի չէ:
Սկզբնապես Սուդանի իշխանությունները հաղորդում էին հինգ
չինացիների սպանության մասին: Երկուսը, նրանց տվյալների համաձայն,
փրկվել են, երկուսը` անհետ կորել: Ավելի ուշ ՉԺՀ ԱԳՆ-ում հաստատել
էին Չինաստանի չորս քաղաքացիների սպանությունը:
Չինաստանի քաղաքացիները` Չինական ազգային նավթագործական
կորպորացիայի երեք ճարտարագետներ եւ վեց բանվորներ, որոնք
արդյունամշակման աշխատանքներ էին կատարում Սուդանի հիմնական
նավթաբեր Աբիեյի շրջանում, զինված մի խումբ մարդկանց կողմից
գերեվարվել էին հոկտեմբերի 18-ին Հարավային Կորդոֆանի նահանգում: