ՀՀ ԿԱՌԱՎԱՐՈՒԹՅՈՒՆԸ ՀԱՎԱՆՈՒԹՅՈՒՆ Է ՏՎԵԼ «ՖԻՆԱՆՍԱԿԱՆ
ՀԱՄԱԿԱՐԳԻ ՀԱՇՏԱՐԱՐԻ ՄԱՍԻՆ» ՕՐԻՆԱԳԾԻՆ
05-06-2008 17:00:00 | Հայաստան | Տնտեսություն
ԵՐԵՎԱՆ, 5 ՀՈՒՆԻՍԻ, ՆՈՅՅԱՆ ՏԱՊԱՆ: ՀՀ կառավարությունը հունիսի
5-ի նիստում հավանության է տվել «Ֆինանսական համակարգի հաշտարարի
մասին», «Սպառողական կրեդիտավորման մասին» եւ «Բանկային ավանդների
ներգրավման մասին» օրենքների նախագծերին:
Ինչպես նիստից հետո լրագրողներին հայտնեց ՀՀ Կենտրոնական
բանկի նախագահի տեղակալ Արթուր Ջավադյանը, օրինագծերի նպատակը
ֆինանսական ծառայություններից օգտվող սպառողների իրավունքների
պաշտպանությունը ֆինանսական համակարգի նկատմամբ սպառողների
վստահության բարձրացումն է:
«Ֆինանսական համակարգի հաշտարարի մասին» օրենքի ընդունման
դեպքում քաղաքացիները հնարավորություն կստանան ֆինանսական
կազմակերպությունների դեմ բողոքները ներկայացնել ֆինանսական
համակարգի հաշտարարին: Ընդ որում, հաշտարարի ծառայություններից
օգտվելը կլինի անվճար: Հաշտարարի առաջնային խնդիրը բողոք
ներկայացրած քաղաքացուն եւ ֆինանսական կազմակերպությանը հաշտեցնելն
է, նրանց համար խնդրի փոխադարձ ընդունելի լուծում գտնելը:
Հաշտատարին նշանակելու է ֆինանսական համակարգի հաշտարարի
գրասենյակի խորհուրդը, որը կազմված է լինելու 7 անդամից, այդ թվում
4-ը` ֆինանսական կազմակերպությունների ներկայացուցիչներ, 1-ը`
սպառողների շահերի պատպանության միությունների ներկայացուցիչ, եւ
մեկական ներկայացուցիչ` կառավարությունից եւ ԿԲ-ից: