«ԱՐՄԵՆՏԵԼ» ՓԲԸ ԳԼԽԱՎՈՐ ՏՆՕՐԵՆ Է ՆՇԱՆԱԿՎԵԼ ՆԵՅՉՈ ՎԵԼԻՉԿՈՎԸ
20-05-2008 17:30:00 | Հայաստան | Տնտեսություն
ԵՐԵՎԱՆ, 20 ՄԱՅԻՍԻ, ՆՈՅՅԱՆ ՏԱՊԱՆ: «Վիմպելկոմ» ԲԲԸ-ն
հայտարարեց Հայաստանի տարածքում Beeline ապրանքանշանի ներքո կապի
ծառայություններ մատուցող դուստր ձեռնարկության` «ԱրմենՏել» ՓԲԸ
գլխավոր տնօրենի պաշտոնում Նեյչո Վելիչկովի նշանակելու մասին:
«ԱրմենՏելը» մեր բիզնեսի կարեւոր բաղկացուցիչն է եւ որոշիչ
տարր այլ երկրներում «Վիմպելկոմի» զարգացման ռազմավարության
համար,- նշեց «Վիմպելկոմ» ԲԲԸ ԱՊՀ երկրներում բիզնեսի զարգացման
գծով գործադիր փոխնախագահ Դմիտրի Պլեսկոնոսը: Ըստ նրա, Հայաստանում
իրենք օժտված են կապի բոլոր տեսակների լիցենզիաներով, եւ գլխավոր
տնօրեն փնտրելիս «հիմք է հանդիսացել Նեյչո Վելիչկովի բազմակողմանի,
եւ որ գլխավորն է, հաջող մենեջերական փորձը»: «Վստահ եմ, որ նրա
գիտելիքները կօգնեն ընկերությանը արդյունավետ իրագործելու առաջավոր
հեռահաղորդակցական տեխնոլոգիաների ներդրման ուղղությամբ իր առջեւ
ծառացած խնդիրները եւ նրա համար ապահովել առաջատար դիրքեր
սպասարկման ոլորտում»,- նշեց Դ. Պլեսկոնոսը:
Մեկնաբանելով իր նշանակումը, Նեյչո Վելիչկովը նշեց. «Այսօր
մեր գլխավոր նպատակն է Հայաստանի տարածքում զարգացնել Beeline
բրենդը, սկսել ծառայություններ 3-րդ սերնդի ցանցի բազայի վրա եւ
կոնվերգենտային ծառայություններ, ինչպես նաեւ բարելավել կապի որակը
եւ սպասարկման մակարդակը: Հաջողության հասնելով այդ
ուղղություններում, մենք անպատճառ ժողովրդականություն կվայելենք
Հայաստանի բնակիչների շրջանում եւ կդառնանք հանրապետության
առաջատար սպասարկող ընկերությունը»:
Նեյչո Վելիչկովը ծնվել է 1961 թվականի սեպտեմբերի 27-ին Սոֆիա
քաղաքում (Բուլղարիա): Բարձրագույն կրթություն ստացել է
Ռուսաստանում, Մոսկվայի միջազգային հարաբերությունների պետական
ինստիտուտում, որն ավարտել է 1990 թվականին: 2001 թվականին ստացել
է MBA աստիճան ԱՄՆ-ի Սիեթլի համալսարանում, իսկ 2007 թվականին`
մենեջմենտի եւ լիդերության դիպլոմ ԱՄՆ-ի Մասաչուսեթսի
տեխնոլոգիական ինստիտուտում: Հեռահաղորդակցության ոլորտում
աշխատում է 2000 թվականից: Եղել է կորպորատիվ վաճառքի
պատասխանատուն Բուլղարիայի խոշորագույն GSM-օպերատոր MobilTel-ում,
ինչպես նաեւ տնօրինել է ընկերության համալիր լուծումների վաճառքն
ու մարկետինգը, որ համադրում են ֆիքսված, շարժական եւ IP
հեռախոսակապի հնարավորությունները: Վերջին երեք տարիներին
գլխավորել է Բուլղարիայի ֆիքսված կապի խոշորագույն օպերատոր
«Բուլղարիայի հեռահաղորդակցական ընկերության» (ԲՀԸ)
բիզնես-սեգմենտի մարկետինգը եւ վաճառքը, որտեղ մասնակցել է
բուլղարական շուկայում շարժական կապի օպերատոր` ԲՀԸ դուստր
ձեռնարկության ստեղծմանն ու առաջխաղացմանը:
Հեռահաղորդակցային բիզնես Նեյչո Վելիչկովը եկել է սեփական
ընկերությունից, որը խորհրդատվական ծառայություններ էր մատուցում
Ռուսաստանում եւ Եվրոհամայնքի երկրներոմւ բիզնեսի հիմնման եւ
զարգացման վերաբերյալ:
Նեյչո Վելիչկովի նվաճումների թվում է կապի նոր
ծառայությունների հաջող ներդրումը շուկայում (կոնվերգենտային
ծառայություններ եւ լուծումներ, GSM Gateway, VoIP լուծումներ, GSM
POS տերմինալներ, mobile VPN):