ՀՀ ՆԱԽԱԳԱՀԸ ԵՎ «ԳԱԶՊՐՈՄ»-Ի ՆԱԽԱԳԱՀԸ ՊԱՅՄԱՆԱՎՈՐՎԵԼ ԵՆ ՄԻՆՉԵՎ
2011Թ. ԳԱԶԻ ՍԱԿԱԳԻՆԸ ՀԱՄԱՁԱՅՆԵՑՎԱԾ ՓՈՓՈԽԵԼ
19-05-2008 23:00:00 | Հայաստան | Տնտեսություն
ԵՐԵՎԱՆ, 19 ՄԱՅԻՍԻ, ՆՈՅՅԱՆ ՏԱՊԱՆ: «Ի դեմս «Գազպրոմի»,
Հայաստանն ունի կայուն եւ հեռանկարային գործընկեր»,- «Գազպրոմ»
ընկերության նախագահ Ալեքսեյ Միլլերի հետ մայիսի 19-ին կայացած
հանդիպման ժամանակ ասել է Հայաստանի նախագահ Սերժ Սարգսյանը:
ՀՀ նախագահի մամլո գրասենյակից ստացված հաղորդագրության
համաձայն, կողմերը գոհունակությամբ փաստել են, որ վերջին տարիներին
«Հայռուսգազարդն» աշխատում է բավականին արդյունավետ, ցուցանիշները
տպավորչ են եւ փաստը, որ Հանրապետությունում էապես ավելացել է գազի
սպառման ծավալը, վկայում է ոչ միայն այդ ընկերության, այլեւ`
Հայաստանի տնտեսության կայուն զարգացման մասին: Որպես կարեւոր
ձեռքբերում նշվել է նաեւ վերջին տարիներին բնակչության կողմից գազի
սպառման ծավալների էական աճը: Ըստ նախագահի, իրականացվող
լայնածավալ գազիֆիկացման արդյունքում Հայաստանն այսօր աշխարհի
ամենագազիֆիկացած երկրներից մեկն է:
Գազի սակագնի եւ գնագոյացման հարցի քննարկման ժամանակ Ալեքսեյ
Միլլերն ասել է, որ «Գազպրոմը» նախատեսում է 2011թ. թե Ռուսաստան,
եւ թե դուրս մատակարարվող գազի համար ապահովել հավասար
եկամտաբերություն: Կողմերը պայմանավորվել են մինչեւ 2011թ. գազի
սակագնի փոփոխությունը համաձայնեցնել քայլ առ քայլ` հաշվի առնելով
«Հայռուսգազարդում» «Գազպրոմ» ընկերության 72 տոկոս բաժնեմասն,
ինչպես նաեւ Հայասատանի Հանրապետության սուբյեկտների համար
ապահովել կանխատեսելիություն եւ մատչելություն:
Հանդիպմանն անդրադարձ է եղել նաեւ նավթավերամշակման գործարանի
կառուցման շուրջ բանակցություններին, ինչպես նաեւ «Գազպրոմի»
կողմից Հայաստանի էներգետիկ համակարգում իրականացվող այլ
ներդրումային ծրագրերի ընթացքին: