2012 Թ.-ԻՆ ՀԱՅԱՍՏԱՆԸ ԻՆՔՆՈՒՐՈՒՅՆ ԿԱՊԱՀՈՎԻ ՀԱՑԱՀԱՏԻԿԻ ԻՐ
ՊԱՀԱՆՋԱՐԿԻ 75%-Ը
16-05-2008 19:55:00 | Հայաստան | Տնտեսություն
ԵՐԵՎԱՆ, 16 ՄԱՅԻՍԻ, ՆՈՅՅԱՆ ՏԱՊԱՆ: 2007 թ.-ին
գյուղնախարարության ընդանուր ծախսերը կազմել են 8 մլրդ դրամ (մոտ
27 մլն դոլար), որից 2 մլրդ դրամն ուղղվել է անտառային տննեսության
եւ անասնաբուժական ծառայության աշխատողների աշխատավարձերին: Մայիսի
16-ին Ազգային ժողովում 2007 թ.-ի պետբյուջեի կատարողականի
քննարկմանը այս մասին նշեց գյուղնախարար Դավիթ Լոքյանը:
Ըստ նրա, անցած տարում նախարարությունն իրականացրել է երեք
խոշոր ծրագրեր: Մասնավորապես, Արագածոտնում եւ Ճամբարակում
իրականացվող սուբսիդավորման ծրագրով յուրաքանչյուր մեկ հեկտար հողի
մշակման համար որոշակի պայմաններով գյուղացուն փոխանցվել է 35
հազար դրամ: Բացի այդ, Հայաստան են ներկրվել եւ ֆերմերներին
փոխանցվել տոհմային անասուններ: Ապրանքային վարկը տրվել է 0%
տոկոսադրույթով եւ 4 տարի մարման ժամկետով: Այս գործընթացը
շարունակվելու է եւ, ըստ նախարարի, վերջին օրերին ներկրվել է եւս
500 գլուխ տոհմային անասուն: Ինչպես նշեց Դ.Լոքյանը, այս ծրագրի
իրականացման արդյունքում նախատեսվում է 2012 թ.-ին
հանրապետությունում արտադրել մինչեւ 1 մլն տոննա կաթնամթերք:
Իրականացվում է նաեւ որոշ հացահատիկային բույսերի ներմուծման եւ
սերմնարտադրության ծրագիր: Պետությունը փոխհատուցում է ծախսերի
որոշակի մասը, ըստ այդմ տնտեսություններին հատկացվում է շուրջ 110
մլն դրամ: Այս ծրագրի կատարման արդյունքում 2011 թ.-ին Հայաստանը
պետք է դառնա ինքնաբավ ցորենի եւ եգիպտացորենի արտադրության գծով,
իսկ 2012 թ.-ին կհասնի ինքնաբավության առաջին մակարդակին`
կբավարարվի հանրապետության հացահատիկի պահանջի 75%-ը:
Նախարարության խոշոր ծրագրերից է նաեւ Արաքս գետի
ափապատնեշների կառուցումը, ինչի համար 2007 թ.-ի աշնանը հատկացվել
է շուրջ 1,4 մլրդ դրամ: Նախարարությունը նաեւ վարկեր է տրամադրում
գյուղական ֆերմերային տնտեսություններին: