ԿՈԼՈՒՄԲԻԱՅՈՒՄ ՊԱՏԱՆԴԱՌՈՒՆԵՐԻ ՁԵՌՔԻՑ ԱԶԱՏ Է ԱՐՁԱԿՎԵԼ
ՆԱԽԱԳԱՀԻ ՆԱԽԿԻՆ ԹԵԿՆԱԾՈՒ ԻՆԳՐԻԴ ԲԵՏԱՆԿՈՒՐԸ
03-07-2008 16:35:00 | Կոլումբիա | Միջազգային
ԲՈԳՈՏԱ, 3 ՀՈՒԼԻՍԻ, ՆՈՅՅԱՆ ՏԱՊԱՆ: Կոլումբիայի զինված ուժերի
հատուկ գործողության ընթացքում ազատվել են 15 պատանդներ, որոնք
երկար ժամանակ գտնվում էին ձախ-ծայրահեղական խմբավորման ձեռքում:
Նրանց թվում է այդ երկրի նախագահի պաշտոնի նախկին թեկնածու Ինգրիդ
Բետանկուրը, որը գերեվարվել էր այսպես կոչված Կոլումբիայի
հեղափոխական զինված ուժերի կողմից 2002 թվականի փետրվարին: Այս
մասին մամլո ասուլիսի ժամանակ հայտնել է Կոլումբիայի պաշտպանության
նախարար Խուան Մանուել Սանթոսը:
Ֆրանսիայի եւ Կոլումբիայի քաղաքացիություն ունեցող Բետանկուրը
հայտարարել է, որ պատանդների ազատումը խաղաղության ազդանշան է
Կոլումբիայում:
Նշվում է նաեւ, որ Ֆրանսիայի նախագահ Նիկոլա Սարկոզին, ելույթ
ունենալով ուղիղ եթերում, շնորհակալություն է հայտնել Կոլումբիայի
նախագահ Ալվարո Ուրիբեին Ինգրիդ Բետանկուրի ազատման համար եւ
Կոլումբիայի հեղափոխական զինված ուժերին կոչ արել դադարեցնել իրենց
«անհեթեթ պայքարը»: