ԸՍՏ ՓՈՐՁԱԳԵՏԻ, ԱԴՐԲԵՋԱՆՈՒՄ ՄԻ ՔԱՆԻ ՏԱՐԻ ԿԼԻՆԻ ԲԱՐՁՐ ԳՆԱճ
22-05-2008 20:30:00 | Հայաստան | Տնտեսություն
ԵՐԵՎԱՆ, 22 ՄԱՅԻՍԻ, ՆՈՅՅԱՆ ՏԱՊԱՆ: Ադրբեջանում գնաճի
մակարդակն ամենաբարձրն է ԱՊՀ երկրների շարքում: Այս մասին մայիսի
22-ին Երեւանում Լրատվամիջոցների կովկասյան ինստիտուտի կողմից
կազմակերպված «Կովկաս-2007» միջազգային կոնֆերանսում նշեց Բաքվի
«3-րդ հայացք» լրատվական-վերլուծական գործակալության գլխավոր
խմբագիր Ռաուֆ Ռաջաբովը: Նա նշեց, որ 2007 թ. Ադրբեջանում գնաճը
կազմել է 16,7%` ծրագրված 9%-ի դիմաց: Այս միտումը կշարունակվի եւս
2-3 տարի:
Գնաճի նման բարձր մակարդակի պատճառներից մեկը, ըստ փորձագետի,
կառավարության կողմից իրականացված «շոկային թերապիան էր», երբ մի
քանի տարի նույն մակարդակի վրա մնալուց հետո գները անցած
տարեսկզբին կտրուկ աճեցին: Մասնավորապես, բնակչության համար
300%-ով աճել են էլեկտրաէներգիայի, 320%-ով` ֆիքսված հեռախոսակապի,
50%-ով` վառելիքի գները: Փորձագետը նշեց նաեւ, որ 2007 թ.
Ադրբեջանի ներմուծումը 420 մլն մանաթով (1 մանաթը մոտ 1,1 դոլար է)
գերազանցել է արտահանումը, ինչը, ըստ նրա, նշանակում է, որ աճում է
Ադրբեջանի կախվածությունը արտաքին շուկաներից: «Այսօր երկիրը
ներմուծում է անհրաժեշտ սննդամթերքի կեսը: Ցավոք, մենք չենք
նկատում, ինչպես ենք մսխում մեր նավթային եկամուտները», - նշեց
Ռ.Ռաջաբովը: Ըստ փորձագետի, նավթադոլարները չեն ազդում գնաճի վրա,
քանի որ հիմնականում մնում են արտասահմանյան բանկերում:
Ըստ Ռ.Ռաջաբովի, Բաքուն դարձել է ԱՊՀ-ում ամենաթանկ քաղաքը:
Երկրում պահպանվում է մենաշնորհների եւ կոռուպցիայի բարձր
մակարդակ: Չնայած երկրի բնակչության եկամուտները անցած տարվա
ընթացքում աճել են 35%-ով, բնակչության 20%-ը ապրում է աղքատության
շեմից ներքեւ:
Փորձագետի խոսքերով, 2001թ. համեմատ 2007թ. Ադրբեջանում
ՀՆԱ-ն բնակչության մեկ շնչի հաշվով աճել է 5 անգամ, կամ 714,3 ԱՄն
դոլարից մինչեւ 3474 դոլար: Սակայն անգամ պաշտոնատար անձինք
խոստովանում են, որ ՀՆԱ-ի կառուցվածքը չի համապատասխանում զարգացած
երկրների տնտեսությանը հատուկ կառոցվածքին, իսկ ազգային
տնտեսության մեջ առաջատար դիրքերում է նավթագազային ոլորտը:
Ռ.Ռաջաբովը նշեց, որ ընթացիկ տարում նավթի ադրյունահանումը կհասնի
իր ամենաբարձր մակարդակին, այնուհետեւ նվազելու միտումով:
Արդյունքում կնվազեն նաեւ արտասահմանյան ներդրումները եւ
զուգահեռաբար կաճի պետական ներդրումների ծավալը: