«ԵՎՐՈՏԵՍԻԼ-2008» ՄԻՋԱԶԳԱՅԻՆ ՄՐՑՈՒՅԹՈՒՄ ՀԱՅԱՍՏԱՆԸ
ԿՆԵՐԿԱՅԱՑՆԻ ՍԻՐՈՒՇՈՆ
16-11-2007 13:23:00 | Հայաստան | Մշակույթ
ԵՐԵՎԱՆ, 16 ՆՈՅԵՄԲԵՐԻ, ՆՈՅՅԱՆ ՏԱՊԱՆ: «Եվրոտեսիլ-2008»
միջազգային մրցույթում Հայաստանը կներկայացնի էստրադային երգչուհի
Սիրուշոն: Երգչուհու թեկնածությունը հաստատվել է Հայաստանի
հանրային հեռուստաընկերության գեղարվեստական խորհրդի կողմից:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեց «Հ1»-ի արտաքին կապերի
բաժնի պետ Դիանա Մնացականյանը, 2008թ. մրցույթում Սիրուշոյի երգը
կորոշվի հեռուստադիտողների շրջանում անցկացվող քվեարկության
արդյունքում:
2008-ին Հայաստանն արդեն երրորդ անգամ է մասնակցելու
«Եվրոտեսիլ» մրցույթին: Ըստ Դ.Մնացականյանի, Եվրոպայում ընդունված
է, երբ մի տարի հեռուստադիտողն է ընտրում երգը եւ երգչին, հաջորդ
տարի դա իրականացնում է տվյալ երկրի հանրային հեռուստատեսության
գեղարվեստական խորհուրդը: Առաջին անգամ երգչի ընտրությունը կատարել
էր «Հ1»-ը, երկրորդ անգամ` հեռուստադիտողը, ընտրելով Հայկոյին եւ
նրա երգը: Այս անգամ «Եվրոտեսիլ-2008»-ում Հայաստանը ներկայացնող
երգչին նույնպես ընտրել է «Հ1»-ը, սակայն ավելի շուտ, քան
նախատեսված էր. դեռեւս մի քանի օր առաջ Դ.Մնացականյանը «ՆՈՅՅԱՆ
ՏԱՊԱՆ»-ի թղթակցին տեղեկացրել էր, որ մրցույթի մասնակցության
հայտերի ընդունումը պետք է շարունակվեր մինչեւ դեկտեմբերի վերջ:
2008թ.-ի փետրվարին «Հ1»-ով պետք է անցկացվեին հանրային լսումներ,
եւ հեռուստադիտողների ուղարկած SMS-երի հիման վրա միայն կորոշվեր
մրցույթում Հայաստանը ներկայացնող երգիչը: Սակայն չսպասելով
հայտերի ընդունմանը, «Հ1»-ը հայտարարեց երգչի անունը: