ԵՐԵՎԱՆԻ ԹՈՒՆԱՔԻՄԻԿԱՏՆԵՐԻ ԳԵՐԵԶՄԱՆՈՑԻ ՎԵՐԱՑՄԱՆ ՀԱՄԱՐ
ԱՆՀՐԱԺԵՇՏ Է ՄՈՏ 2,5 ՄԼՆ ԵՎՐՈ
28-09-2007 20:35:00 | Հայաստան | Հասարակություն
ԵՐԵՎԱՆ, 28 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Երեւանի Էրեբունի
համայնքում գտնվող թունաքիմիկատների գերեզմանոցի ավելի քան 500
տոննա աղբի վերացման միջոցառումների մշակման նպատակով պետք է
ստեղծվի աշխատանքային խումբ` ՀՀ բնապահպանության եւ տարածքային
կառավարման նախարարությունների, ԳԱԱ-ի համապատասխան մասնագետների
մասնակցությամբ: Ինչպես սեպտեմբերի 28-ի ասուլիսում նշեց «Հայ
կանայք հանուն առողջության եւ առողջ շրջակա միջավայրի» հասարակական
կազմակերպության գործադիր տնօրեն Լիլիկ Սիմոնյանը, այդ առաջարկով
իրենք դիմել են ՀՀ կառավարություն: Նշվեց, որ 1982թ.-ին կառուցված
Թունաքիմիկատների գերեզմանոցում թաղվել է խորհրդային տարիներին
գործող կոլխոզներից եւ սովխոզներից բերված ավելի քան 500 տոննա
գյուղատնտեսական քիմիկատ, որի 50%-ը վտանգավոր եւ արգելված կայուն
քլորօրգանական միացություններ են: Գերեզմանոցի ստեղծման ժամանակ
հաշվի չի առնվել այդ տարածքի խիստ սողանքային լինելը. մինչ օրս
գերեզմանոցը տեղաշարժվել է մոտ 10 մետրով: Ներկայումս սողանքները
շարունակվում են` ընդգրկելով ավելի մեծ տարածքներ:
Ըստ Լ.Սիմոնյանի, թունաքիմիկատները վնասազերծելու համար պետք
է դրանք այլ երկրներ տեղափոխել, ինչի համար անհրաժեշտ է մոտ 2,5
մլն եվրո գումար: Նա ընդգծեց, որ ուշացնելու դեպքում ավելի մեծ
ծախսեր կպահանջվեն, քանի որ սողանքների արդյունքում աղբի
տարածվածությունը մեծանում է: «Մենք ակնկալում ենք, որ գումարի
60-70%-ը կտրամադրի ԱՄՆ Միջազգային զարգացման գործակալությունը,
սակայն դրա համար անհրաժեշտ է նաեւ ՀՀ կառավարության կողմից
որոշակի ֆինանսական ներդրումներ»,- ասաց Լ.Սիմոնյանը:
Ի դեպ, թունաքիմիկատների գերեզմանոցի վերացումը Ստոկհոլմի
կոնվենցիայով Հայաստանի ստանձնած պարտավորություններից է: