ՀՈՒՆԻՍԻ 23-ԻՆ ՀԱՅԱՍՏԱՆՈՒՄ ԱՆՑԿԱՑՎԵՑ ՄԻՋԱԶԳԱՅԻՆ ՕԼԻՄՊԻԱԿԱՆ
ՎԱԶՔԻ ՕՐԸ
25-06-2007 18:06:00 | Հայաստան | Սպորտ
ԵՐԵՎԱՆ, 25 ՀՈՒՆԻՍԻ, ՆՈՅՅԱՆ ՏԱՊԱՆ: Տարբեր սեռի եւ տարիքի
ավելի քան 1500 վազքասերներ մասնակցեցին ՄՕԿ-ի հովանու ներքո
հունիսի 23-ին անցկացված Միջազգային օլիմպիական վազքի օրվան
նվիրված միջոցառմանը: ՀԱՕԿ-ը այս անգամ ընդարձակել էր ծրագիրը`
ներառելով նաեւ խճուղային հեծանվավազք, անվասայլակավորների վազք եւ
առագաստանավային սպորտ:
Երեւանի Հանրապետության հրապարակում միջոցառման մասնակիցներին
ողջունեց ՀՀ սպորտի եւ երիտասարդության հարցերի նախարար Արմեն
Գրիգորյանը: Ընթերցվեց ՄՕԿ-ի նախագահ բելգիացի Ժակ Ռոգեի ուղերձը:
Վազքարշավն անցավ Ամիրյան փողոց - Մաշտոցի պողոտա -
«Հաղթանակի» կամուրջ - «Հրազդան» մարզադաշտ երթուղով: Մեկնարկի
ելան հաջորդաբար հեծանվորդները, վազորդները, անվասայլակավորները:
«Հրազդան» մարզադաշտի հրապարակում մրցանակակիրներին
հանձնվեցին ՀԱՕԿ-ի պատվոգրեր եւ դրամական պարգեւներ, իսկ բոլոր
մասնակիցներին` ՄՕԿ-ի հավաստագրեր եւ մարզաշապիկներ: Ամենատարեց
մասնակցի համար սահմանված մրցանակները ստացան 71-ամյա Ջեմմա
Գալստյանը եւ 87-ամյա Վահե Դանիելյանը: