ԹԱՏԵՐԱԿԱՆ ԳՈՐԾԻՉՆԵՐԸ ՊԵՏՔ Է ՄԻԱՎՈՐՎԵՆ` «ԹԱՏԵՐԱԿԱՆ ՔԱՈՍԻՑ»
ԴՈՒՐՍ ԳԱԼՈՒ ՀԱՄԱՐ,- ԱՍՈՒՄ ԵՆ ՌՈՒԲԵՆ ԲԱԲԱՅԱՆՆ ՈՒ ԱՐԱ ԵՐՆՋԱԿՅԱՆԸ
21-06-2007 20:26:00 | Հայաստան | Մշակույթ
ԵՐԵՎԱՆ, 21 ՀՈՒՆԻՍԻ, ՆՈՅՅԱՆ ՏԱՊԱՆ: Հայաստանում ստեղծված
«թատերական քաոսից» դուրս գալու համար ավագ, միջին եւ երիտասարդ
սերունդների թատերական գործիչները պետք է միավորեն իրենց ուժերը եւ
միասնաբար մշակեն «Թատրոնի մասին» օրենքի նախագիծը: Այս մասին
հունիսի 21-ի համատեղ ասուլիսում հայտարարեց Երեւանի Կամերային
եւ Հովհ.Թումանյանի անվան Պետական տիկնիկային թատրոնների
գեղարվեստական ղեկավարներ Արա Երնջակյանը եւ Ռուբեն Բաբայանը:
Վերջինիս խոսքերով, անկախությունից հետո թատերական ոլորտում որեւէ
բարեփոխում չի իրականացվել: Ըստ Ռ.Բաբայանի, միայն փորձ արվեց
մշակել «Թատրոնի մասին» օրենքի մի նախագիծ, որը դեկլարատիվ բնույթի
էր, եւ որի ընդունումը ավելի շատ խնդիրներ կառաջացներ թատրոնի
մարդկանց համար: «Պետք է միջոցներ ձեռնարկել, որպեսզի ԱՊՀ մի շարք
երկրների նման Հայաստանում եւս զարգացում ապրի թատերարվեստը»,-
նշեց նա:
Անդրադառնալով որոշ թատրոններին պետական կարգավիճակից զրկելու
մասին լուրերին, Ա.Երնջակյանը նշեց, որ դա կնշանակի կործանել
թատերարվեստը: «Եթե թատրոններին պետական աջակցություն չցուցաբերվի,
ապա կկրկնվի «Փոսի» եւ «Մետրո» թատրոնների ճակատագիրը: Մեզ մոտ
դեռեւս չի ձեւավորվել մեկենասության ինստիտուտը, այդ իսկ պատճառով
անիմաստ է նման հարց բարձրացնելը»,- ընդգծեց Կամերային թատրոնի
ղեկավարը Ա.Երնջակյանը:
Ասուլիսի մասնակիցների կարծիքով, որպեսզի Հայաստանում զարգանա
թատերարվեստը, հարկավոր է պատշաճ մակարդակի բարձրացնել նաեւ
թատերական քննադատությունը: Այսօրվա մամուլում, ըստ նրանց,
բացակայում են այս կամ այն բեմադրության լուրջ մասնագիտական
վերլուծությունները: «Քննադատները ինչպես կարող են
վերլուծություններ անել, եթե թատրոններ չեն հաճախում: Դրա համար էլ
որոշ թատրոններում, որոնք համարվում են անձեռնմխելի, 15 տարի է
նույն բեմադրություններն են ներկայացվում»,- նշեցին Ա.Երնջակյանը
եւ Ռ.Բաբայանը: