ԱՄՆ կառավարությունը Հայաստանի ոստիկանությանը նվիրաբերեց
սարքավորումներ եւ ավտոմեքենաներ` անօրինական միգրացիայի դեմ
պայքարին աջակցելու նպատակով
27-11-2009 17:10:00 | Հայաստան | Հասարակություն
ԵՐԵՎԱՆ, 27 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 27-ին ԱՄՆ
կառավարությունը ՀՀ ոստիկանության Կազմակերպված հանցավորության դեմ
պայքարի գլխավոր վարչության անօրինական միգրացիայի դեմ պայքարի եւ
միջազգային համագործակցության բաժնին նվիրաբերեց համակարգչային
տեխնիկա եւ երկու ավտոմեքենա` 70 հազար ԱՄՆ դոլար ընդհանուր
արժեքով: Այս նվիրատվությամբ ԱՄՆ կառավարությունը նպատակ ունի
աջակցել անօրինական միգրացիայի դեմ ՀՀ ոստիկանության
աշխատանքներին:
Ինչպես հանդիսավոր արարողությանը նշեց Հայաստանում ԱՄՆ-ի
փոխդեսպան Ջոզեֆ Փենինգտոնը, անօրինական միգրացիան ոչ միայն ինքնին
հանցագործություն է, այլեւ միջոց է, որով հանցավոր տարրերը փորձում
են խուսափել պատասխանատվությունից: «Անօրինական միգրացիան
հնարավորություններ է բացում ահաբեկչության, մարդկանց թրաֆիկինգի,
թմրամիջոցների փոխադրումների, անձի ինքնության տվյալները
շահարկելու եւ նաեւ կազմակերպված հանցավորության համար»,- ասաց նա:
ՀՀ Ոստիկանության պետի տեղակալ, ոստիկանության
գեներալ-լեյտենանտ Հովհաննես Հունանյանը նշեց, որ Հայաստանում քաջ
գիտակցում են անօրինական միգրացիայի վտանգները: Այդ իսկ պատճառով
Կազմակերպված հանցավորության դեմ պայքարի գլխավոր վարչության
կազմում ստեղծվել է ապօրինի միգրացիայի հարցերով զբաղվող բաժին,
իսկ Հայաստանի կառավարությունն էլ Ազգային Ժողովի քննարկմանն է
ներկայացրել օրենքի նախագիծ, որի նպատակն է միգրացիոն ամբողջ
փաթեթը համապատասխանեցնել միջազգային չափանիշներին: