Երեւանում կանցկացվի Հայաստանի երիտասարդական ակումբների եւ
կենտրոնների համաժողովը
20-11-2009 18:28:00 | Հայաստան | Հասարակություն
ԵՐԵՎԱՆ, 20 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 21-22-ին
Երեւանում կանցկացվի Հայաստանի երիտասարդական ակումբների եւ
կենտրոնների համաժողովը: Այն կազմակերպել է Երիտասարդական
ակումբների դաշնությունը (ԵԱԴ)` ՀՀ Սպորտի եւ երիտասարդության
հարցերի նախարարության աջակցությամբ:
Ինչպես նշվում է ԵԱԴ-ի հաղորդագրությունում, ներկայումս
Հայաստանում գործող երիտասարդական կենտրոնների ու ակումբների թիվն
անցնում է 150-ից: Սակայն ստեղծվել է մի իրավիճակ, երբ նրանք
գործում են կողք-կողքի, բայց միմյանց գործունեության մասին
տեղեկացված չեն: Նշվում է նաեւ, որ հանրապետությունում մշակված չէ
երիտասարդական ակումբային շարժման զարգացման հայեցակարգ, չկան
երիտասարդական ակումբի կամ կենտրոնի գործունեության սկզբունքների
վերաբերյալ ընդհանուր մոտեցումներ եւ չափանիշներ: Եվ համաժողովի
հիմնական նպատակն է Հայաստանում երիտասարդական ակումբային շարժման
կազմակերպումը եւ զարգացումը: