ՀԱԿ-ի երիտասարդ ակտիվիստի նկատմամբ ոստիկանների
գործողությունները օրինական են,- գտնում է Երեւանի ոստիկանապետը
02-10-2009 17:52:00 | Հայաստան | Հասարակություն
ԵՐԵՎԱՆ, 2 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ոստիկանության Երեւանի
վարչության պետ, գեներալ-մայոր Ներսես Նազարյանը օրինական է
համարում Հայ Ազգային կոնգրեսի երիստասարդական թեւի ներկայացուցիչ
Տիգրան Առաքելյանի նկատմամբ ոստիկանների գործողությունները:
Հոկտեմբերի 2-ի ասուլիսում նա նշեց, որ ընդդիմության երիտասարդ
ակտիվիստները, այդ թվում Տ.Առաքելյանը երթերի եւ հանրահավաքների
ժամանակ չեն ենթարկվում ոստիկանների օրինական պահանջներին,
անվայելուչ կեցվածք են դրսեւորում, անձնական վիրավորանքներ
հնչեցնում երկրի ղեկավարության հասցեին: Ըստ Ն.Նազարյանի,
Տ.Առաքելյանը մի քանի անգամ զգուշացվել էր եւ բերման ենթարկվել
ոստիկանություն:
Հիշեցնենք, որ Տ.Առաքելյանը հուլիսի 1-ին ընդդիմության
հանրահավաքի մասին իրազեկելիս ընդհարվել էր ոստիկանների հետ, ինչի
հետեւանքով ստացել վնասվածք գլխի շրջանում: Ներկայումս
Տ.Առաքելյանը գտնվում է կալանքի մեջ եւ մեղադրվում է ՀՀ Քրեական
օրենսգրքի 316 հոդվածի երկրորդ մասով` «Իշխանության ներկայացուցչի
նկատմամբ կյանքի կամ առողջության համար վտանգավոր բռնություն
գործադրելը», եւ 258 հոդվածի երրրորդ մասով` «Խուլիգանություն»: