ՀՈԿՏԵՄԲԵՐԻ 11-13-ԻՆ ԵՐԵՎԱՆՈՒՄ ԿԱՆՑԿԱՑՎԻ «ՄԱՐԴՈՒ
ԱՌՈՂՋՈՒԹՅՈՒՆԸ» ԱԶԳԱՅԻՆ ԳԻՏԱԲԺՇԿԱԿԱՆ 5-ՐԴ ԿՈՆԳՐԵՍԸ
06-10-2006 14:18:00 | Հայաստան | Հասարակություն
ԵՐԵՎԱՆ, 6 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Առողջապահության
նախարարության եւ առողջապահության հիմնահարցերով զբաղվող մի շարք
կազմակերպությունների նախաձեռնությամբ հոկտեմբերի 11-13-ը
Առողջապահության ազգային ինստիտուտում կանցկացվի «Մարդու
առողջությունը» ազգային գիտաբժշկական 5-րդ կոնգրեսը: Այս մասին
«ՆՈՅՅԱՆ ՏԱՊԱՆ»-ի թղթակցին հայտնեց կոնգրեսի կազմկոմիտեի նախագահ
Դավիթ Պետրոսյանը: Նա նշեց, որ կոնգրեսում կներկայացվեն 40 գիտական
աշխատանքներ:
Դ.Պետրոսյանը հայտնեց նաեւ, որ Առողջապահության ազգային
ինստիտուտում կոնգրեսի օրերին կգործի նաեւ միջազգային ցուցահանդես,
որին կմասնակցեն հայրենական եւ արտասահմանյան դեղագործական,
բուժտեխնիկա արտադրող, բժշկական ծառայություններ մատուցող մոտ 15
ձեռնարկություններ:
Դ.Պետրոսյանը նշեց, որ կոնգրեսի բացման օրը տեղի կունենա նաեւ
Անահիտ Չիբուխչյանի` Արցախյան պատերազմին մասնակցած բժիշկների
մասին պատմող, «Արարման 6-րդ օրը» փաստավավերագրական գրքի
շնորհանդեսը: Շնորհանդեսին կհաջորդի գրքի հերոս 107 բժիշկներին ՀՀ
Առողջապահության նախարարության պատվոգրերի հանձնման հանդիսավոր
արարողությունը: