ԵՐԵՎԱՆԻ ՊՌՈՇՅԱՆԻ ԳԻՆՈՒ ԳՈՐԾԱՐԱՆՈՒՄ ԱՅՍ ՏԱՐԻ ԿԿԱՏԱՐՎԵՆ 1 ՄԼՆ
ԴՈԼԱՐԻ ՆԵՐԴՐՈՒՄՆԵՐ
20-09-2006 18:00:00 | Հայաստան | Տնտեսություն
ԵՐԵՎԱՆ, 20 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Երեւանի Պռոշյանի
կոնյակի գործարանը այս տարի նախատեսում է մթերել 6000 տոննա խաղող,
1000 տոննա խնձոր: Իսկ որոշ մրգատեսակների` թթի, հոնի, մոշի եւ
սալորի, մթերման աշխատանքներն արդեն ավարտվել են: Ինչպես «ՆՈՅՅԱՆ
ՏԱՊԱՆ»-ի թղթակցին հայտնեց ձեռնարկության գործադիր տնօրեն Արմեն
Գասպարյանը, այս տարի, մասնավորապես, մթերվել է 2000 տոննա թութ եւ
400 տոննա հոն: Առաջիկայում կսկսվի նռան մթերումը, իսկ
դեկտեմբերին` սերկեւիլի:
Ա.Գասպարյանը նշեց նաեւ, որ անցած տարվա համեմատ խաղողի եւ
խնձորի մթերման գները մնացել են անփոփոխ` 1 կգ-ի համար,
համապատասխանաբար 120-130 դրամ (մոտ 0,4 ԱՄՆ դոլար) եւ 15 դրամ:
Ամեն տարի գործարանը խաղողագործների հետ կնքվում է պայմանագրեր,
նրանց տրամադրվում բուժանյութեր, իսկ խաղողագործները պարտավորվում
են որոշակի քանակությամբ խաղող հանձնել գործարանին:
Գործարանը, որը մասնագիտացված է հիմնականում գինու եւ կոնյակի
արտադրության մեջ, մի քանի տարի է, ինչ սկսել է արտադրել նաեւ թթի,
հոնի եւ ծիրանի օղի, որը, ըստ Ա.Գասպարյանի, մեծ պահանջարկ ունի
արտաքին շուկայում: Գործարանում արտադրվող գինիների տեսականին`
խաղողի եւ մրգային (նռան, խնձորի, բալու), հասնում է 14-ի: Այս
տարվանից գործարանը կարտադրի նաեւ սալորի գինի, ինչը, ըստ
Ա.Գասպարյանի, նորություն է ամբողջ աշխարհում: Գործարանում
արտադրվում են նաեւ 7-8 տեսակի 3-15 տարվա հնությամբ կոնյակներ:
Պռոշյանի գործարանի արտադրանքի 40%-ը արտահանվում է,
մասնավորապես` Ռուսաստան եւ ԱՄՆ: «Հայկական գինիները իրենց
որակական հատկություններով չեն զիջում արտասահմանյան գինիներին:
Այդ պատճառով մենք արտաքին շուկայում որեւէ խնդիր չունենք»,- նշեց
Ա.Գասպարյանը:
Ա.Գասպարյանը հայտնեց նաեւ, որ այս տարի գործարանում
նախատեսվում է կատարել շուրջ 1 մլն դոլարի կապիտալ ներդրումներ, իսկ
արտադրոթյան ծավալները ավելացնել 20%-ով: