ԵՐԵՎԱՆ, 29 ՄԱՅԻՍԻ, ՆՈՅՅԱՆ ՏԱՊԱՆ: Խորհրդային Հայաստանի առաջին ժողովրդական արտիստի կոչմանն արժանացած անվանի բեմադրիչ, դերասան եւ թատրոնի շինարար Իսահակ Ալիխանյանի ծննդյան 130-ամյակին էր նվիրված մայիսի 29-ին Հայաստանի Թատերական գործիչների միությունում կայացած հուշ-ցերեկույթը: Իսահակ Ալիխանյանն իր հարուստ ու բազմազան թատերական գործունեությամբ ուրույն տեղ ունի հայ թատրոնի պատմության մեջ,- ընդգծեց օրվա բանախոս, Գաբրիել Սունդուկյանի անվան Ազգային ակադեմիական թատրոնի գեղարվեստական ղեկավար Վահե Շահվերդյանը: Նրա խոսքերով, երիտասարդ սերունդը գրեթե չի ճանաչում Ալիխանյանին, իսկ նրա գործընկերներն ու սերնդակիցներն այլեւս չկան, սակայն այդ փաստն ամենեւին էլ չի ստվերում մեծ դերասանի անցած բեղմնավոր ուղին: Իսահակ Ալիխանյանը սկզբնական շրջանում խաղացել է Բաքվի հայկական թատրոնում, ապա տեղափոխվել է Թբիլիսիի հայկական թատրոն: Նա մի քանի այլ դերասանների հետ 1922 թ. Թբիլիսից հրավիրվել է Երեւան` հիմնադրելու Գաբրիել Սունդուկյանի անվան Պետական ակադեմիական թատրոնը: Մայր թատրոնի բեմում անվանի դերասանը բեմադրել է Սունդուկյանի «Պեպո»-ն եւ միաժամանակ խաղացել գլխավոր հերոսի` Պեպոյի դերը: Իր կյանքի մի կարճ շրջան ապրելով եւ աշխատելով Երեւանում` տաղանդավոր դերասանն ու բեմադրիչը հետագայում վերադարձել է Թբիլիսի:

---