ՀԱՅԱՍՏԱՆՈՒՄ ԱՌԱՋԻՆ ԱՆԳԱՄ ԱՆՑԿԱՑՎՈՒՄ Է ՊԼԱՍՏԻԿ, ԷՍԹԵՏԻԿ ԵՎ
ՎԵՐԱԿԱՆԳՆՈՂԱԿԱՆ ՎԻՐԱԲՈՒԺՈՒԹՅԱՆ ՄԻՋԱԶԳԱՅԻՆ ԿՈՆԳՐԵՍ
12-04-2006 17:50:00 | Հայաստան | Հասարակություն
ԵՐԵՎԱՆ, 12 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 12-14-ը Երեւանում
անցկացվող Պլաստիկ, էսթետիկ եւ վերականգնողական վիրաբուժության
5-րդ միջազգային կոնգրեսին մասնակցում են ԱՄՆ-ի, Գերմանիայի,
Ֆրանսիայի, Իսպանիայի, Ռուսասատանի, Նիդեռլանդների, Բելառուսիայի,
Վրաստանի, Ուկրաինայի եւ այլ երկրների առաջատար վիրաբույժներ:
Կոնգրեսը կազմակերպվել է Պլաստիկ, վերականգողական եւ էսթետիկ
վիրաբույժների հայկական ասոցիացիայի եւ Ռուսասատնի համանուն
վիրաբույժների ընկերության կողմից:
Ինչպես նշեց ՀՀ առողջապահության նախարար Նորայր Դավիդյանը,
նման միջոցառում Հայաստանում անց է կացվում առաջին անգամ, ինչը
վկայում է տվյալ բնագավառում հայ վիրաբույժների միջազգային
ճանաչման եւ բարձր գնահատականի մասին: Ըստ նախարարի, պլաստիկ
վիրաբուժությունը ժամանակակից բժշկության զարգացող
ուղղություններից է:
Ն.Դավիդյանի խոսքերով, ժամանակակից բժշկագիտությունը իր
մարդասիրական առաքելությամբ եւ համամարդկային նշանակությամբ
բազմազգ է եւ չի ճանաչում սահմաններ: Ըստ նրա, արտերկրից ժամանած
անվանի մասնագետների հետ այսօրինակ հանդիպումները եւ փորձի
փոխանակումը կնպաստեն հայ բժիշկների մասնագիտական ունակությունների
բարձրացմանը, երիտասարդ մասնագետների ուսուցմանը, ինչպես նաեւ
հայրենական բժշկության ինտեգրմանը համաշխարհային բժշկագիտության
ոլորտում:
ՀՀ առաջին տիկին Բելլա Քոչարյանի խոսքերով, «դժվար է
պատկերացնել ժամանակակից կյանքը առանց պլաստիկ վիրաբուժության,
որովհետեւ անսահման է մարդու ձգտումը դեպի կատարյալը»: Ըստ նրա,
Հայաստանում միջազգային կոնգրեսի անցկացումը ապացուցում է, որ
բժշկագիտության այդ ոլորտի հայկական դպրոցը արագ է զարգանում եւ
վստահություն է վայելում միջազգային համապատասխան կառույցների
կողմից: