ՀԱՅԱՍՏԱՆ-ԻՐԱՆ ԵՐԿԱԹՈՒՂՈՒ ՇԻՆԱՐԱՐՈՒԹՅԱՆ ՆԱԽԱԳԾԻ ԻՐԱԿԱՆԱՑՄԱՆ
ՀԱՐՑՈՒՄ ԵՏԴԱՐՁԻ ՃԱՆԱՊԱՐՀ ՉԿԱ,- ՀԱՅՏԱՐԱՐՈՒՄ Է ՀՀ ՎԱՐՉԱՊԵՏԸ
18-11-2008 21:40:00 | Հայաստան | Տնտեսություն
ԵՐԵՎԱՆ, 18 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ կառավարությունը
կայացրել է քաղաքական որոշում, որ Հայաստան-Իրան երկաթուղու
կառուցումը խիստ անհրաժեշտ է Հայաստանի համար, եւ համապատասխան
աշխատանքներն արդեն սկսվել են պետբյուջեի միջոցներով: Այդ նախագծի
իրականացման հարցում ետդարձի ճանապարհ չկա: Այս մասին նոյեմբերի
18-ին հայտարարեց ՀՀ վարչապետ Տիգրան Սարգսյանը:
Նրա խոսքերով, երկաթուղու կառուցման երեք տարբերակ ներառող
նախագծերը հայկական գիտահետազոտական ինստիտուտների կողմից մշակվել
են վաղուց, կան համապատասխան նախնական հաշվարկներ, ՀՀ
կառավարության կողմից իրականացվել են բազային բոլոր
հետազոտությունները: Այնուամենայնիվ, Ասիական զարգացման բանկի
դրամաշնորհային միջոցներով բանկի մասնագետների հետ համատեղ
կատարվելու են լրացուցիչ նախագծային աշխատանքներ, ինչը կընձեռի այդ
նախագծերն արդիականացնելու, ժամանակակից տեխնիկայի կիրառման հետ
կապված հաշվարկներ կատարելու հնարավորություն:
Ըստ ՀՀ տրանսպորտի եւ կապի նախարար Գուրգեն Սարգսյանի,
Հայաստան-Իրան երկաթուղու շիանրարության երեք տարբերակներից
նախընտրելին 447 կմ երկարությամբ երկաթուղու տարբերակն է: Մյուս
երկու տարբերակների դեպքում երկաթուղին կունենա կամ 373 կմ, կամ
443 կմ երկարություն: Երեք տարբերակների դեպքում էլ երկաթուղին
ձգվելու է երկու երկրների սահմանից մինչեւ Ջերմուկ, եւ, ըստ
նախընտրելի տարբերակի, այն կանցնի Սելիմի լեռնանցքով, Մարտունիով,
Գավառով եւ կհասնի մինչեւ Գագարին գործող կայարանը: Նախարարի
գնահատմամբ, երկաթուղու շինարարությունը կպահանջի 5 տարի:
Նրա տվյալներով, ԱԶԲ-ից Հայաստանին տրամադրվելիք 1 մլն ԱՄՆ
դոլար դրամաշնորհի շրջանակներում կիրականացվեն նշված երկաթուղու եւ
զուգահեռ անցկացվելիք ավտոճանապարհի նախագծային աշխատանքները:
Փորձագետների տվյալներով, Հայաստան-Իրան երկաթուղու
շինարարությունը կարժենա 1,5-2 մլրդ դոլար: