ՌԻԳԱ, 5 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Լատվիայի վարչապետ Այգարս Կալվիտիսը դեկտեմբերի 5-ին նախագահ Վալդիս Զատլերսին ներկայացրել է իր գլխավորած կառավարության հրաժարականի դիմում: Դրա պատճառ է դարձել հասարակության անվստահությունը Լատվիայի նախարարների կաբինետի նկատմամբ, որն արտահայտվել է բողոքի զանգվածային ցույցերով: Կառավարության առաջիկա հրաժարականի մասին վարչապետը հայտարարել էր նոյեմբերի սկզբին, որից հետո նոր կաբինետի ձեւավորման բանակցություններ էին սկսվել ներկայիս կոալիցիայի եւ ընդդիմադիր կուսակցությունների միջեւ: Սակայն մինչ օրս վերջնականապես հայտնի չէ, թե ով է մտնելու նոր կառավարող կոալիցիայի կազմի մեջ, ոչ էլ` ով է լինելու ապագա վարչապետը:

---