Վաշինգտոնը երկարաձգել է պատժամիջոցները որոշ բելոռուսական իշխանությունների նկատմամբ
11-06-2016 17:17:27 | | Հասարակություն
ԱՄՆ-ի նախագահ Բարք Օբաման երկարաձգել է մի շարք բելոռուս պաշտոնյաների նկատմամբ սահմանափակող միջոցառումների գործողության ժամկետը: Interfax.ru-ի փոխանցմամբ` ԱՄՆ-ի կոնգրեսին հասցեագրված համապատասխան փաստաթուղթը հրապարակված է Սպիտակ տան պաշտոնական կայքում:
Փաստաթղթում նշվում է, որ Բելոռուսի կառավարության որոշ անդամների և այլ անձանց գործողությունները և քաղաքականությունը շարունակում է ԱՄՆ-ի ազգային անվտանգության և արտաքին քաղաքականության համար ոչ սովորական սպառնալիք ստեղծել:
«Այս պատճառով սահմանափակող միջոցառումները, որոնք հայտարարվել են 2006 թվականի հունիսի 16-ից, պետք է շարունակեն գործել 2016 թվականի հունիսի 16-ից հետո ևս»,- ասված է փաստաթղթում:
Նշենք, որ 2006 թվականի հունիսի 16-ին ԱՄՆ-ի կոնգրեսին նախագահ Ջորջ Բուշի կողմից արված ուղերձում հանձնարարվում է սառեցնել Բելոռուսի նախագահ Ալեքսանդր Լուկաշենկոյի և ինը այլ բարձրաստիճան պաշտոնյաների ֆինանսական հաշիվները, ինչպես նաև արգելվում է ամերիկացիներին կատարել ինչ-որ գործարքներ նրանց հետ: