ԵՐԵՎԱՆ, 16 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հայաստանում ԱՄՆ-ի դեսպան Մարի Լ. Յովանովիչը, ՀՀ փոխվարչապետ, տարածքային կառավարման նախարար Արմեն Գեւորգյանը, գյուղատնտեսության նախարար Գերասիմ Ալավերդյանը սեպտեմբերի 16-ին Արագածոտնի մարզպետ Սարգիս Սահակյանի եւ Կոտայքի մարզպետ Կովալենկո Շահգելդյանի ուղեկցությամբ այցելել են ՀՄՀ-Հայաստան ծրագրի շրջանակներում վերականգնվող Արզնի-Շամիրամ մայր ջրանցքի վերանորոգված տեղամաս: Արզնի-Շամիրամ ջրանցքը Հայաստանի մայր ջրանցքների համակարգի այն վեց ջրանցքներից մեկն է, որը վերականգնվելու է ՀՄՀ-Հայաստանի «Ոռոգվող Գյուղատնտեսություն» ենթածրագրի շրջանակներում: Այնուհետեւ նրանք այցելել են Արագածոտնի մարզի Կարբի համայնք` ծանոթանալու ջրի ներտնտեսային կառավարման դասընթացների մասնակից ֆերմերի տնտեսությանը, որտեղ վերջինս կիրառում է գյուղատնտեսական նոր տեխնոլոգիաները: ՀՄՀ-Հայաստան ծրագրի շրջանակներում ֆինանսավորվել է կաթիլային ոռոգման համակարգի տեղադրումը, որը հնարավորություն է տվել ֆերմերին անցնելու ավելի արդյունավետ եւ շահութաբեր ոռոգմանը: Տվյալ տնտեսությունը ՀՄՀ-Հայաստան ծրագրի շրջանակներում ֆինանսավորվող այն բազմաթիվ ցուցադրական տնտեսություններից մեկն է, որտեղ տեղակայված են ծրագրի շրջանակներում ձեռք բերված տեխնիկական սարքավորումները: Այցելությունները նման ցուցադրական տեղամասեր լրացնում են ուսուցման դասընթացներում ձեռք բերված գիտելիքները` ֆերմերներին հնարավորություն տալով տեսնել, թե ինչպես են գործնականում կիրառվում ուսուցանված նոր մոտեցումները: Ըստ «ՆՏ»-ին տրամադրված հաղորդագրության, մինչ օրս ՀՄՀ-Հայաստան ծրագրի «Ոռոգվող գյուղատնտեսություն» ենթածրագրի շրջանակներում Հայաստանի մոտ 300 համայնքների ավելի քան 30 հազար ֆերմերներ ուսուցանվել են ջրի կառավարման տեխնոլոգիաների եւ բարձրարժեք գյուղատնտեսության թեմաներով: Կոտայքի եւ Արագածոտնի մարզերի 60 համայնքներում ուսուցանված ֆերմերների թիվը կազմում է մոտ 5000:

---