ՀՀ ԱԺ-Ն ՍԿՍԵՑ 2009 Թ.-Ի ՊԵՏԲՅՈՒՋԵԻ ՆԱԽԱԳԾԻ ՔՆՆԱՐԿՈՒՄԸ
12-11-2008 21:00:00 | Հայաստան | Տնտեսություն
ԵՐԵՎԱՆ, 12 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ Ազգային Ժողովը
նոյեմբերի 12-ի լիագումար նիստում սկսեց 2009թ. պետբյուջեի մասին
օրենքի նախագծի քննարկումը: Կառավարությունը հոկտեմբերի վերջին ԱԺ
մշտական հանձնաժողովներում քննարկված նախագիծը ներկայացրել է
անփոփոխ:
Ինչպես նշեց ՀՀ ֆինանսների նախարար Տիգրան Դավթյանը, նախնական
քննարկումներից հետո ԱԺ-ից ստացվել է շուրջ 400 գրավոր առաջարկ:
Դրանց, ինչպես եւ լիագումար նիստում քննարկումների ժամանակ արվելիք
առաջարկությունների հիման վրա կառավարությունը կլրամշակի
օրինագիծը:
Ըստ ներկայացված նախագծի, ՀՀ 2009թ. համախմբված բյուջեն
եկամուտների գծով կկազմի 927 մլրդ դրամ, ծախսերի գծով` 967 մլրդ
դրամ, դեֆիցիտը` 40 մլրդ դրամ:
ՀՀ համայնքների 2009թ. բյուջեները եկամուտների եւ ծախսերի
գծով կկազմեն 50 մլրդ դրամ: 2009թ. պետական բյուջեն եկամուտների
գծով նախատեսված է 905,4 մլրդ դրամ, ծախսերի գծով` 945,4 մլրդ
դրամ, դեֆիցիտը` 40 մլրդ դրամ: