Իրանը պետք է դադարեցնի Նախիջևանին հարվածի ժխտումը. Ադրբեջանի ՊՆ նոր հայտարարությունը
05-03-2026 17:30:45 | Ադրբեջան | Ի՞նչ է գրում մամուլը
1lurer.am Ադրբեջանի պաշտպանության նախարարությունը կրկին հայտարարություն է տարածել Նախիջևանին անօդաչուների հարվածների վերաբերյալ:
«Իրանի Իսլամական Հանրապետության զինված ուժերի գլխավոր շտաբի հայտարարությունն այն մասին, որ Իրանը հարգում է բոլոր երկրների, հատկապես՝ մուսուլմանական և հարևան պետությունների ինքնիշխանությունը, և որ այսօր Իրանը, իբր, անօդաչու թռչող սարքերի կիրառմամբ Ադրբեջանի դեմ հարձակումներ չի իրականացրել, որևէ պարագայում ընդունելի չի կարող համարվել:
Ըստ առկա տեղեկությունների՝ տեխնիկական միջոցների օգնությամբ պարզվել է, որ Իրանի զինված ուժերի չորս անօդաչու թռչող սարք է ուղարկվել՝ Ադրբեջանի Նախիջևան շրջանի վրա հարձակումներ իրականացնելու համար: Դրանցից մեկը ոչնչացվել է ադրբեջանական բանակի ուժերի կողմից, իսկ մյուսները թիրախավորել են քաղաքացիական ենթակառուցվածքները, այդ թվում՝ ավագ դպրոցը ուսումնական ժամերին։ Դպրոցը թիրախավորող անօդաչու սարքը, բարեբախտաբար, չի հասել թիրախին և պայթել է շենքի կողքին՝ գետնին:
Հաշվի առնելով վերոնշյալը՝ ակնկալում ենք, որ Իրանի Իսլամական Հանրապետության զինված ուժերը դադարեցնեն տեղի ունեցածի բացահայտ ժխտումը, կատարվածի համար ներողություն խնդրեն, և մեղավորներին պատժեն իրանական համապատասխան մարմինները»,- ասված է հայտարարության մեջ:
Տեղի ունեցածի ֆոնին հեռախոսազրույց են ունեցել Ադրբեջանի և Թուրքիայի ԱԳ նախարարներ Ջեյհուն Բայրամովը և Հաքան Ֆիդանը:
ՀԱՅԵՐԵՆ
Русский
English
Դաս. հայերեն
French
