ՍԵԴՐԱԿ ԶԱՏԻԿՅԱՆԻ ՍՊԱՆՈՒԹՅԱՆ ԳՈՐԾԻ ՔՆՆՈՒԹՅՈՒՆԸ ԿՍԿՍՎԻ
ՍԵՊՏԵՄԲԵՐԻ 14-ԻՆ
12-09-2007 15:40:00 | Հայաստան | Հասարակություն
ԵՐԵՎԱՆ, 12 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Մալաթիա-Սեբաստիա
համայնքի նախկին թաղապետի որդի Սեդրակ Զատիկյանի սպանության գործի
քննությունը` կատարողի եւ օժանդակողների մասով կսկսվի սեպտեմբերի
14-ին: Ինչպես «ՆՈՅՅԱՆ ՏԱՊԱՆ»-ի թղթակիցը տեղեկացավ Երեւանի
Մալաթիա-Սեբաստիա համայնքի առաջին ատյանի դատարանում, գործով
դատաքննությունը կիրականացվի նշված դատարանի նախագահ Տիգրան
Պետրոսյանի նախագահությամբ: Դատարանի առջեւ կկանգնեն սպանության
կատարման մեջ մեղադրվող Արսեն Առուշանյանը եւ սպանությանը
օժանդակելու մեջ մեղադրվող Արթուր Հովհաննիսյանն ու Լուսինե
Ղեւոնդյանը:
Սպանությունը պատվիրելու եւ դրդելու համար մեղադրվող Նարեկ
Խաչատրյանը եւ Ստեփան Հակոբյանը հետախուզվում են, նրանց գործն
առանձնացվել է առանձին վարույթ:
Ըստ մեղադրական եզրակացության, Արսեն Առուշանյանը`
Ն.Խաչատրյանի եւ Ս.Հակոբյանի պատվերով եւ դրդմամբ, Ա.Հովհաննիսյանի
եւ Լ.Ղեւոնդյանի օժանդակությամբ շահադիտական դրդումներով, շատերի
կյանքի համար վտանգավոր եղանակով 2006թ. հունիսի 22-ին ժամը
14.45-սահմաններում Երեւանի Սեբաստիա եւ Տիչինա փողոցների
խաչմերուկում «ԱԿ 74» ինքնաձիգից սպանել էր Ս.Զատիկյանին եւ
պատահական անցորդ Կարինե Սարգսյանին: