ԵՐԵՎԱՆ, 21 ՄԱՐՏԻ, ՆՈՅՅԱՆ ՏԱՊԱՆ: Մարտի 21-ին ՀՀ արտաքին գործերի նախարար Վարդան Օսկանյանին իր հավատարմագրերի կրկնօրինակն է հանձնել Հայաստանում Իսրայելի դեսպան Էհուդ Գոլը (Ehud Gol, նստավայրը` Երուսաղեմ): Ըստ ՀՀ ԱԳՆ Մամուլի եւ տեղեկատվության վարչությունից «ՆՈՅՅԱՆ ՏԱՊԱՆ»-ին տրամադրած հաղորդագրության, Վ.Օսկանյանը եւ Է.Գոլը քննարկել են տարածաշրջանային խնդիրներ, իսրայելա-պաղեստինյան եւ Լեռնային Ղարաբաղի հակամարտությունների կարգավորման հեռանկարները: Է.Գոլը ծնվել է 1946թ. Երուսաղեմում: Աշխատանքային գործունեության ընթացքում վարել է հետեւյալ պաշտոնները` հյուպատոս (մամուլի եւ տեղեկատվության հարցերով) Չիկագոյում Իսրայելի Գլխավոր հյուպատոսությունում, հյուպատոս` Նյու-Յորքում Գլխավոր հյուպատոսությունում, 1986-88թթ.` ԱԳՆ խոսնակ, մամուլի վարչության տնօրեն, 1986-88թթ.` նախագահի հատուկ խորհրդական, 1988-91թթ.` Ռիո Դե Ժանեյրոյում Գլխավոր հյուպատոս, 1991-92թթ.` վարչապետի խորհրդական մամուլի հարցերով, 1995-99թթ.` Իսրայելի դեսպան Իսպանիայում, համատեղության կարգով նաեւ` Անդորրայում, 1999-2001թթ.` ԱԳՆ գլխավոր տնօրենի տեղակալ Արեւմտյան Եվրոպայի հարցերով, 2001-06թթ.` Իսրայելի դեսպան Իտալիայում, 2007թ. համատեղության կարգով նշանակվել է Իսրայելի դեսպան Հայաստանում, Ղրղզստանում, Տաջիկստանում եւ Թուրքմենստանում:

---