ՊԱՏԳԱՄԱՎՈՐՆԵՐԸ ԱՌԱՋԱՐԿՈՒՄ ԵՆ ԵՐԿԱՐԱՁԳԵԼ «ԳՅՈՒՄՐԻ ՔԱՂԱՔԻ
ՎԵՐԱԿԱՆԳՆՄԱՆ ՄԱՍԻՆ» ՕՐԵՆՔԻ ԳՈՐԾՈՂՈՒԹՅԱՆ ԺԱՄԿԵՏԸ
04-12-2006 19:35:00 | Հայաստան | Հասարակություն
ԵՐԵՎԱՆ, 4 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 4-ի նիստում
ՀՀ Ազգային Ժողովը 1-ին ընթերցմամբ քննարկեց «Գյումրի քաղաքի
վերականգնման մասին» օրենքում փոփոխություններ եւ լրացումներ
կատարելու մասին օրինագիծը: «Օրինաց երկիր» խմբակցության անդամներ,
գյումրեցիներ Սամվել Բալասանյանի եւ Հովհաննես Մարգարյանի
հեղինակած նախագծով առաջարկվում է նշված օրենքի գործողության
ժամկետը 2007թ.-ի հունվարի 1-ից երկարաձգել մինչեւ 2014թ-ի
դեկտեմբերի 31-ը:
Առաջիկայում պատգամավորները ակնկալում են քննարկել
շրջանառության մեջ գտնվող նույն օրենքում նոր փոփոխություններ եւ
լրացումներ նախատեսող օրինագիծը, որը միտված է Գյումրիի առջեւ
ծառացած խնդիրների համապարփակ լուծմանը, այդ թվում նոր
աշխատատեղերի բացմանը, գործազրկության կրճատմանը: