ԵՐԵՎԱՆ, 1 ՕԳՈՍՏՈՍԻ, ՆՈՅՅԱՆ ՏԱՊԱՆ: Երեւանի «Դինամո»
մարզադահլիճում հուլիսի 31-ին տեղի ունեցավ ֆուտզալի Հայաստանի
գավաթի խաղարկության եզրափակիչ խաղը: Գավաթի համար վճռական
պայքարում հանդիպեցին ֆուտզալի Հայաստանի 2004թ.-ի չեմպիոն եւ
գավաթակիր Երեւանի «Թալ Գրիգը» եւ Երեւանի «Ադանան»: Ինչպես
«ՆՈՅՅԱՆ ՏԱՊԱՆ»-ին հայտնեցին Հայաստանի ֆուտբոլի ֆեդերացիայի
Մամուլի քարտուղարությունից, հանդիպումն ավարտվեց 20-6 հաշվով`
հոգուտ «Թալ Գրիգի», որը եւ երկրորդ անգամ անընդմեջ նվաճեց
ֆուտզալի Հայաստանի գավաթը:
Հանդիպման ավարտին «Թալ Գրիգ» թիմի ֆուտբոլիստներին հանձնվեց
պատվավոր գավաթը եւ առաջին կարգի դիպլոմը: «Թալ Գրիգ»-ի
ֆուտբոլիստներին հանձնվեց նաեւ ֆուտզալի Հայաստանի 2004/2005 թթ.
առաջնության չեմպիոնի փոխանցիկ գավաթը, ոսկե մեդալներ եւ առաջին
կարգի դիպլոմներ:
Վանաձորի «Ցալկուտ» թիմին խաղացողներին հանձնվեցին
առաջնության արծաթե մեդալները եւ երկրորդ կարգի դիպլոմները, իսկ
Երեւանի «Պոլիտեխնիկ» թիմին` բրոնզե մեդալներն ու երրորդ կարգի
դիպլոմները: