ՀԱՅԱՍՏԱՆԻ ՈՒԺԵՂԱԳՈՒՅՆ ՊԱՏԱՆԻ ՇԱԽՄԱՏԻՍՏՆԵՐԸ ԿՄԱՍՆԱԿՑԵՆ
ԱՇԽԱՐՀԻ ՈՒ ԵՎՐՈՊԱՅԻ ԱՌԱՋՆՈՒԹՅՈՒՆՆԵՐԻՆ
25-04-2005 19:10:00 | Հայաստան | Սպորտ
ԵՐԵՎԱՆ, 25 ԱՊՐԻԼԻ, ՆՈՅՅԱՆ ՏԱՊԱՆ: Ավարտվեց շախմատի Հայաստանի
պատանեկան առաջնությունը: 5 տարիքային խմբերում միաժամանակ
ընթանում էին տղաների ու աղջիկների 10 մրցաշարեր, որոնց ընդհանուր
առմամբ մասնակցեցին հանրապետության տարբեր քաղաքների 240
ներկայացուցիչներ:
Ըստ տարիքային խմբերի Հայաստանի չեմպիոններ դարձան մինչեւ 10
տարեկանների խմբում - Արա Դիլոյանը (Շիրակ) եւ Սուսաննա Գաբոյանը
(Երեւան), 12 տարեկանների - Հայկ Թամազյանը եւ Զոզա Շաքարյանը (2-ն
էլ` Երեւան), 14 տարեկաների - Տիգրան Սիմոնյանը (Լոռի) եւ Դիանա
Մնացականյանը (Կոտայք), 16 տարեկանների - Դավիթ Քալաշյանը
(Գյումրի) եւ Նունե Դարբինյանը (Երեւան), 18 տարեկանների խմբում -
Արման Փաշիկյանը (Երեւան) եւ Լիա Մարտիրոսյանը (Լոռի):
Բոլոր մրցաշարերում 1-3-րդ տեղեր գրաված շախմատիստներն ու
շախմատիստուհիները պարգեւատրվեցին դրամական մրցանակներով: Իսկ
ուժեղագույններն իրավունք ստացան մասնակցելու աշնանը կայանալիք
աշխարհի ու Եվրոպայի պատանեկան առաջնություններին: