ԵՐԵՎԱՆ, 2 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դրեզդենի շախմատի համաշխարհային օլիմպիադայի 11-րդ փուլից հետո Ուկրաինայի տղամարդկանց հավաքականի առաջատար Վասիլի Իվանչուկը հրաժարվել է արյան փորձանմուշ հանձնել դոպինգ հանձնաժողովին: Հայտնելով այս մասին, «Ռեգնում» գործակալությունը նշում է, որ այդ պատճառով օլիմպիադայում Վ.Իվանչուկի ցույց տված արդյունքը չեղյալ է հայտարարվել, իսկ իրեն սպառնում է 2 տարվա որակազրկում: Ըստ նույն աղբյուրի, «Գափրինդաշվիլու գավաթ» մրցանակը ետ կվերցվի Ուկաինայի պատվիրակներից եւ կհանձնվի Հայաստանի շախմատիստներին: Գավաթը սահմանել է աշխարհի նախկին չեմպիոնուհի Նոնա Գափրինդաշվիլին, եւ այն հանձնվում է համաշխարհային օլիմպիադայում տղամարդկանց եւ կանանց թիմերի վաստակած ընդհանուր միավորների առավելագույն հանրագումար ունեցող թիմին: Դրեզդենի օլիմպիադայում Հայաստանի եւ Ուկրաինայի թիմերը վաստակել էին հավասար միավորներ, բայց գործակիցներով առավելությունը տրվել էր ուկրաինացիներին:

---