Հովհաննես Իգիթյան. Շարունակում են չլուծված մնալ
քաղբանտարկյալների, հանրահավաքների անցկացման, ԶԼՄ-ների ազատության
եւ մարտի 1-ի բացահայտման խնդիրները
31-03-2009 16:55:00 | Հայաստան | Քաղաքական
ԵՐԵՎԱՆ, 31 ՄԱՐՏԻ, ՆՈՅՅԱՆ ՏԱՊԱՆ: Եվրախորհրդի խորհրդարանական
վեհաժողովի (ԵԽԽՎ) մոնիտորինգի հանձնաժողովի մարտի 30-ի նիստում
225-րդ եւ 300-րդ քրեական հոդվածների վերաշարադրման մասին հայկական
պատվիրակության նախագահ Դավիթ Հարությունյանի զեկույցը
եվրոպացիներն ընկալել են որպես առաջընթաց: Այսպիսի տեսակետ հայտնեց
«Հայոց համազգային շարժում» կուսակցության վարչության անդամ
Հովհաննես Իգիթյանը մարտի 31-ի ասուլիսում` նշելով, որ այդ
կարծեցյալ առաջընթացի մասին պատկերացումը եվրոպական պաշտոնյաների
մոտ ձեւավորվել է Հայաստանի գլխավոր դատախազ Աղվան Հովսեփյանի,
Ազգային Ժողովի նախագահ Հովիկ Աբրահամյանի եւ Դ.Հարությունյանի
շնորհիվ: «Երբ ԵԽԽՎ-ի համազեկուցողները եկան Ա.Հովսեփյանի մոտ, նա
բողոքեց նշված հոդվածներից եւ ասաց, որ դրանք հնարավորություն չեն
տալիս նորմալ մեղադրանքներ առաջադրել»,- ասաց Հ.Իգիթյանը: Դրանից
հետո, նրա խոսքերով, համազեկուցողներն այցելեցին Հ.Աբրահամյանին,
ինչի արդյունքում ԱԺ-ն Դ.Հարությունյանի միջոցով փոխեց
քրհոդվածները:
Հ.Իգիթյանը նշեց, որ «արդյո՞ք Հայաստանում ժողովրդավարության
կայացման ուղղությամբ առաջընթաց է գրանցվել» հարցի պատասխանը ի
վերջո պետք է տա հայ հասարակությունը: Իսկ հասարակությունը, ինչպես
ընդգծեց ՀՀՇ-ի ներկայացուցիչը, շատ լավ գիտի, թե ինչ է կատարվել
մարտի 1-ին, ով է սպանել 10 քաղաքացիներին, ում հրամանով, ովքեր են
եղել Հայաստանի նախկին նախագահ Ռոբերտ Քոչարյանի աշխատասենյակում
2008թ.-ի փետրվարի 29-ին` խաղաղ ցուցարարներին ցրելու մասին
քննարկումների ժամանակ: Նա, սակայն, չմասնավորեցրեց, թե ովքեր են
եղել Ռ.Քոչարյանի աշխատասենյակում:
Հ.Իգիթյանը հայտարարեց, որ Հայաստանում առկա չորս հիմնական
խնդիրները շարունակում են մնալ չլուծված` քաղբանտարկյալները ազատ
արձակված չեն, հանրահավաքները չեն թույլատրվում, լրատվամիջոցները
ազատ չեն գործում, մարտի 1-ի դեպքերի մեղավորները պաշտոնապես
բացահայտված եւ պատժված չեն: