«Հազարամյակի մարտահրավեր» կորպորացիան հետաձգել է Հայաստանին
6,8 միլիոն դոլար տրամադրելու հարցը
15-12-2008 20:00:00 | Հայաստան | Տնտեսություն
ԵՐԵՎԱՆ, 15 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Ինչպես տեղեկացնում է
«Ազատություն» ռադիոկայանը, դեկտեմբերի 11-ին «Հազարամյակի
մարտահրավեր» կորպորացիայի տնօրենների խորհրդի նիստում
մտահոգություններ են արտահայտվել Հայաստանում ժողովրդավարական
կառավարման առնչությամբ: Տնօրենների խորհուրդն ընդգծել է. -
«Ակնկալում ենք, որ Հայաստանը կկատարի իր պարտավորությունները,
իրական բարեփոխումներ կիրագործի»:
«Հազարամյակի մարտահրավեր» կորպորացիայի տնօրենների խորհուրդը
որոշել է, որ Հայաստանում գյուղական ճանապարհների վերականգնման եւ
ոռոգման ցանցի բարելավման համար «Հազարամյակի մարտահրավեր»
հիմնադրամին 6 միլիոն 811 հազար 305 դոլարի գումար հատկացնելու
հարցը կրկին քննության կառնվի 2009 թվականի մարտին:
Միաժամանակ ռադիոկայանը հիշեցնում է, որ դեկտեմբերի 10-ին
Հայաստանի վարչապետի ներկայությամբ տեղի էր ունեցել «Հազարամյակի
մարտահրավեր» հիմնադրամի խորհրդի նիստը, որի ժամանակ վավերացվել էր
2009 թվականի առաջին եռամսյակում իրականացվելիք ծրագրերի համար
«Հազարամյակի մարտահրավեր» կորպորացիային ներկայացվող 10-րդ
հատկացման հայտը: