Կառավարությունը դեռեւս չի կարող հաշվարկել Հայաստանի
տնտեսության վրա համաշխարհային ճգնաժամի ազդեցության հնարավոր
ծավալները
03-12-2008 21:00:00 | Հայաստան | Տնտեսություն
ԵՐԵՎԱՆ, 3 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Չնայած արտահանման
ծավալների կրճատմանը եւ ռուսաստանյան կապիտալի դուրս բերմանը
երկրից, համաշխարհային տնտեսական ճգնաժամը դերեւս չի անդրադարձել
Հայաստանի վրա: ՀՀ Ազգային Ժողովի դեկտեմբերի 3-ի նիստում
պատասխանելով պատգամավոր Սամվել Սարգսյանի հարցին այս մասին
հայտնեց ՀՀ ֆինանսների նախարար Տիգրան Դավթյանը:
Ըստ նրա, Հայաստանը զերծ մնաց ճգնաժամի առաջին փուլի`
ֆինանսական ճգնաժամի, ազդեցությունից, քանի որ երկրի ֆինանսական
համակարգը դեռեւս ինտեգրված չէ համաշխարհային համակարգում, եւ,
բացի այդ, այն շատ փոքր ծավալ ունի: Ինչ վերաբերում է տնտեսական
ճգնաժամին, ապա այն դեռ նոր է սկսվել, եւ Հայաստանի վրա դրա
ազդեցության ժամանակը եւ ծավալը այսօր հնարավոր չէ հաշվարկել:
Ֆինանսների նախարարը նշեց, որ ճգնաժամի ազդեցությունը
մեղմելու համար կառավարությունը որոշ քայլեր է ձեռնարկում:
Մասնավորապես, որոշվել է 50 մլն ԱՄՆ դոլարին համարժեք գումար
հատկացնել փոքր եւ միջին բիզնեսին աջակցելու նպատակով: Բացի այդ,
բանակցություններ են վարվում Համաշխարհային բանկի հետ Հայաստանին
ցուցաբերվող ֆինանսական աջակցությունը կրկրնապատկելու վերաբերյալ:
Տ.Դավթյանը նշեց, որ խոսքը գնում է մոտ 1 մլրդ ԱՄՆ դոլարի մասին: